ന്യൂഡല്‍ഹി: ലോക്‌സഭാ തെരഞ്ഞെടുപ്പിന്റെ ഒന്നാം ഘട്ടത്തിനുള്ള ഒരുക്കങ്ങള്‍ തുടങ്ങിയിരിക്കെ രാഷ്ട്രീയ പാര്‍ട്ടികള്‍ തിരക്കിട്ട് സ്ഥാനാര്‍ഥികളെ പ്രഖ്യാപിച്ചു തുടങ്ങി.
ശനിയാഴ്ച 48 സ്ഥാനാര്‍ഥികളുമായി ബി.ജെ.പി തങ്ങളുടെ ആറാമത്തെ പട്ടിക പുറത്തിറക്കിയപ്പോള്‍ കോണ്‍ഗ്രസ് നേതൃത്വം 38 സ്ഥാനാര്‍ഥികളുമായി എട്ടാമത്തെ പട്ടികയാണ് പുറത്തിറക്കിയത്. ഇന്നലെ 10 സ്ഥാനാര്‍ഥികളുടെ കൂടി പട്ടിക കോണ്‍ഗ്രസ് പുറത്തുവിട്ടു.

പ്രമുഖ കോണ്‍ഗ്രസ് നേതാക്കള്‍ക്ക് ഇടം നല്‍കികൊണ്ടുള്ളതാണ് എട്ടാമത്തെ പട്ടിക. മല്ലികാര്‍ജുന്‍ ഖാര്‍ഗെ, മഹാരാഷ്ട്ര മുന്‍മന്ത്രി അശോക് ചവാന്‍ തുടങ്ങിയവര്‍ പട്ടികയിലുണ്ട്. മല്ലികാര്‍ജുന്‍ ഖാര്‍ഗെ കര്‍ണാടകയിലെ ഗുല്‍ബെര്‍ഗയിലും അശോക് ചവാന്‍ നാന്ദഡിലും മത്സരിക്കും. മുന്‍മന്ത്രിയും മുതിര്‍ന്ന കോണ്‍ഗ്രസ് നേതാവുമായ പി. ചിദംബരത്തിന്റെ മകന്‍ കാര്‍ത്തി ചിദംബരം തമിഴ്‌നാട്ടിലെ ശിവഗംഗയില്‍ നിന്ന് മത്സരിക്കും.

ചിദംബരം തുടര്‍ച്ചയായി മത്സരിച്ച മണ്ഡലമാണ് ശിവഗംഗ. കള്ളപ്പണ ഇടപാടുമായി ബന്ധപ്പെട്ട് ആരോപണ വിധേയനായ കാര്‍ത്തി ചിദംബരം പക്ഷെ മണ്ഡലത്തില്‍ ഇത്തരത്തിലുള്ള വിയോജിപ്പുകളൊന്നും തനിക്കെതിരേ ഉയര്‍ന്നിട്ടില്ലെന്ന് വ്യക്തമാക്കുന്നു. രണ്ടാം തവണയാണ് കാര്‍ത്തി ഇവിടെ മത്സരിക്കുന്നത്. 2014ല്‍ മത്സരിച്ചെങ്കിലും അണ്ണാ ഡി.എം.കെ സ്ഥാനാര്‍ഥി സെന്തില്‍ നാഥനോട് പരാജയപ്പെടുകയായിരുന്നു.