സ്വന്തം ലേഖകന്‍

തിരുവനന്തപുരം: വിവാദമായതിനെ തുടര്‍ന്ന് പമ്പയില്‍നിന്നു മണല്‍ പുറത്തേക്കു കൊണ്ടുപോകുന്നത് വനംവകുപ്പ് വിലക്കി. 

പ്രളയം തടയാനായി മണല്‍ നീക്കാം. എന്നാല്‍ പുറത്തേക്കു കൊണ്ടുപോകരുതെന്ന് വനംവകുപ്പ് അഡീഷനല്‍ ചീഫ് സെക്രട്ടറി ആശ തോമസ് ഉത്തരവിറക്കി.

ഇതോടെ മണലെടുപ്പുകരാറില്‍നിന്ന് ക്ലേയ്‌സ് ആന്‍ഡ് സെറാമിക് പ്രൊഡക്ട്‌സ് പിന്മാറി. മണല്‍ വില്‍ക്കാന്‍ അനുമതിയില്ലെങ്കില്‍ പ്രയോജനമില്ലെന്ന് ചെയര്‍മാന്‍ ടി.കെ. ഗോവിന്ദന്‍ പ്രതികരിച്ചു. ഇടപാടില്‍ അഴിമതിയില്ലെന്നും ചെയര്‍മാന്‍ കൂട്ടിച്ചേര്‍ത്തു. വനത്തിനുള്ളില്‍നിന്നു മണലെടുത്തു കൊണ്ടുപോകാന്‍ കേന്ദ്ര വനംവകുപ്പിന്റെ ഉത്തരവു വേണമെന്ന് വനംമന്ത്രി കെ.രാജു പറഞ്ഞു. പ്രളയം തടയാന്‍ വേണ്ടി മണല്‍ നീക്കാനേ അനുമതി നല്‍കിയിരുന്നുള്ളൂവെന്നും അതു വനംവകുപ്പ് നിര്‍ദേശിക്കുന്ന സ്ഥലത്ത് കൂട്ടി ഇടണമെന്നുനിര്‍ദേശം നല്‍കിയിരുന്നുവെന്നും രാജു പ്രതികരിച്ചു. 

മന്ത്രി അറിയാതെ

തിരക്കിട്ട നീക്കം

ഇതോടെ 2018ലെ പ്രളയത്തെ തുടര്‍ന്ന് അടിഞ്ഞുകൂടിയ അവശിഷ്ടങ്ങള്‍ നീക്കം ചെയ്യാന്‍ അനുമതി നല്‍കിയ നടപടികളില്‍ ദുരൂഹത ഏറുകയാണ്. വിരമിക്കുന്നതിനു തലേദിവസം മുന്‍ ചീഫ് സെക്രട്ടറി ടോം ജോസ്, പുതിയ ചീഫ് സെക്രട്ടറി ബിശ്വാസ് മേത്ത, സംസ്ഥാന പൊലിസ് മേധാവി ലോക്‌നാഥ് ബെഹ്‌റ എന്നിവര്‍ ഹെലികോപ്റ്ററില്‍ നേരിട്ട് എത്തിയാണ് മണല്‍ നീക്കം വേഗത്തിലാക്കാന്‍ നിര്‍ദേശം നല്‍കിയത്. 

വനംവകുപ്പിന്റെ കീഴില്‍ വരുന്ന വിഷയമായിട്ടും പമ്പയില്‍ നേരിട്ടെത്തി നടത്തിയ യോഗം വനം മന്ത്രി കെ. രാജുവിനെയോ അഡീഷണല്‍ ചീഫ് സെക്രട്ടറി ആശ തോമസിനെയോ അറിയിച്ചില്ല. ഇതില്‍ അഴിമതിയുണ്ടെന്ന് പ്രതിപക്ഷവും ആരോപിച്ചിരുന്നു. സംഭവം വിവാദമായതിനെ തുടര്‍ന്നാണ് വനം സെക്രട്ടറി ആശ തോമസിനോട് പമ്പയില്‍നിന്നു മണല്‍ കൊണ്ടു പോകുന്നതു തടയാന്‍ മന്ത്രി നിര്‍ദേശം നല്‍കിയത്.