മുക്കം: കാരശേരി പഞ്ചായത്തിലെ നെല്ലിക്കാപറമ്പില്‍ പഴകിയ മത്സ്യം കഴിച്ച് ഭക്ഷ്യവിഷബാധയേറ്റ് ഇരുപതോളംപേര്‍ ചികിത്സ തേടി. വ്യാഴം, വെള്ളി ദിവസങ്ങളില്‍ വാങ്ങിയ മത്സ്യം കഴിച്ച കുട്ടികളടക്കമുള്ളവര്‍ക്കാണ് അസ്വാസ്ഥ്യം അനുഭവപ്പെട്ടത്. മുക്കം എന്‍.സി ഹോസ്പിറ്റല്‍, എരഞ്ഞിമാവ് റിലീഫ് ആശുപത്രി, അഗസ്ത്യന്‍മുഴി സെന്റ് ജോസഫ് ആശുപത്രി എന്നിവിടങ്ങളിലാണ് ഭക്ഷ്യവിഷബാധയേറ്റവരെ പ്രവേശിപ്പിച്ചത്.
മത്സ്യങ്ങള്‍ കേടാകാതിരിക്കാന്‍ ഉപയോഗിക്കുന്ന അമോണിയയുടെ അമിതമായ സാന്നിധ്യമായിരിക്കാം വിഷാംശത്തിന് കാരണമെന്ന് ഡോക്ടര്‍മാര്‍ പറഞ്ഞു.
രാസപദാര്‍ഥങ്ങള്‍ ഉപയോഗിച്ച് ദിവസങ്ങളോളം സൂക്ഷിക്കുന്ന മത്സ്യങ്ങള്‍ മുക്കത്തും പരിസരത്തും വില്‍പന നടത്തുന്നത് വ്യാപകമാണ്.
ഇതിനെതിരേ നിരവധി പരാതികള്‍ ലഭിച്ചിട്ടും പരിശോധനകള്‍ നടത്താനോ ഫലപ്രദമായ രീതിയിലുള്ള നടപടികള്‍ സ്വീകരിക്കുവാനോ ആരോഗ്യവകുപ്പ് തയാറാകാത്തതില്‍ പ്രതിഷേധം ശക്തമാണ്.