തിരുവനന്തപുരം: പ്രവാസികളെ തിരികെ കൊണ്ടുവരുന്നത് പരിമിതപ്പെടുത്തുന്ന സംസ്ഥാന  സര്‍ക്കാര്‍, അവരെ കൈവിട്ടതുപോലെയാണ് പെരുമാറുന്നതെന്ന് മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പി.  വിദേശത്ത് കുടുങ്ങിയവര്‍ അവിടെ കിടക്കട്ടെ എന്നാണ് സര്‍ക്കാരിന്റെ ഇപ്പോഴത്തെ നിലപാട്. പ്രവാസികളുടെ കാര്യത്തില്‍ സര്‍ക്കാര്‍ കുറച്ചുകൂടി താല്‍പര്യം കാണിക്കണം. എത്രയും പെട്ടെന്ന് ആളുകളെ നാട്ടിലെത്തിക്കാനുള്ള നടപടികളുണ്ടാവണമെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു. 

രണ്ടരലക്ഷം പേര്‍ക്ക് സൗകര്യമൊരുക്കിയെന്ന് പറഞ്ഞിട്ട് പതിനായിരം പേര്‍ വന്നപ്പോഴേക്കും പ്രവാസികളുടെ വരവ് സംസ്ഥാന സര്‍ക്കാര്‍ തടയുകയാണ്. വിദേശത്ത് മരിച്ചവരുടെ കുടംബങ്ങള്‍ക്ക് സര്‍ക്കാര്‍ ഒരു സഹായവും നല്‍കുന്നില്ല. 

വിമാനങ്ങളുടെ എണ്ണം കുറയ്ക്കണമെന്ന് സംസ്ഥാനം ആവശ്യപ്പെട്ടതായാണ്  കേന്ദ്രമന്ത്രി വി മുരളീധരന്‍ വെളിപ്പെടുത്തിയത്. സംസ്ഥാനത്തെ ഉദ്യോഗസ്ഥരും അക്കാര്യം സ്ഥിരീകരിച്ചിട്ടുണ്ട്. അങ്ങനെയെങ്കില്‍ പ്രവാസികളെ നാട്ടിലെത്തിക്കുന്നത് അനന്തമായി നീണ്ടുപോകുമെന്നും കുഞ്ഞാലിക്കുട്ടി പറഞ്ഞു. അടിസ്ഥാന സൗകര്യങ്ങള്‍ ഒരുക്കിയശേഷം ഓണ്‍ലൈന്‍ ക്ലാസുകള്‍ ആരംഭിച്ചിരുന്നെങ്കില്‍ വളാഞ്ചേരിയില്‍ വിദ്യാര്‍ഥിനിയുടെ മരണം ഒഴിവാക്കാമായിരുന്നു എന്ന് പ്രതിപക്ഷ ഉപനേതാവ് എം.കെ മുനീര്‍ പറഞ്ഞു.  പിന്നാക്കവിഭാഗം വിദ്യാര്‍ഥികള്‍ക്ക് ലാപ് ടോപ് നല്കുന്നതിനുള്ള പദ്ധതിക്ക് കെല്‍ട്രോണിന് പണം നല്‍കി നാളുകളായിട്ടും അവര്‍ ഉപകരണങ്ങള്‍ കൈമാറിയിട്ടില്ലെന്നും മുനീര്‍ ആരോപിച്ചു. പി.കെ ബഷീര്‍ എം.എല്‍.എയും വാര്‍ത്താസമ്മേളനത്തില്‍ പങ്കെടുത്തു.