ശ്രികണ്ഠപുരം: മലയോര മേഖലയില്‍ മുപ്ലിവണ്ടുകള്‍ എന്ന ഓട്ടുറുമ പ്രാണികളുടെ ശല്യം രൂക്ഷമാവുന്നു. വേനല്‍മഴ തകര്‍ത്ത് പെയ്തതോടെയാണ് റബ്ബര്‍, കശുമാവ് തോട്ടങ്ങളിലെ ഇലക്കൂനകളില്‍ നിന്നും രാത്രിയോടെ ഇവ കൂട്ടത്തോടെ പുറത്തിറങ്ങുന്നത്.
 തീന്‍മേശകളിലും അടുക്കളയിലെ ആഹാര സാധനങ്ങളിലും പാറി വീഴുന്ന ഇവയുടെ ശല്യം പ്രതിരോധിക്കാന്‍ സാധിക്കാത്ത സ്ഥിതിയാണ്. ശല്യം രൂക്ഷമായതോടെ വിളക്കണച്ച് നില്‍ക്കേണ്ട ഗതികേടിലാണ് മലോരത്തെ വീടുകളും കച്ചവടസ്ഥാപനങ്ങളും. കൂടാതെ ഇവ ദേഹത്ത് വീണാല്‍ ചൊറിച്ചിലും പൊള്ളലും അനുഭവപ്പെടുന്നുമുണ്ട്. ഇവയെ പ്രതിരോധിക്കാന്‍ പ്രതിരോധ മരുന്നുകള്‍ എത്തിക്കണമെന്നാണ് ജനങ്ങളുടെ ആവശ്യം.