ന്യൂഡല്‍ഹി : പാലക്കാട് ജില്ലയില്‍ കാട്ടാന സ്‌ഫോടകവസ്തു പൊട്ടിത്തെറിച്ച് ചരിഞ്ഞ സംഭവത്തില്‍ മലപ്പുറത്തിന് നേരെ തിരിഞ്ഞ് കേന്ദ്രമന്ത്രി പ്രകാശ് ജാവദേക്കറും. സംഭവം കേന്ദ്രം വളരെ ഗൗരവകരമായാണ് എടുത്തിട്ടുള്ളതെന്നും അദ്ദേഹം ട്വീറ്റ് ചെയ്യുന്നു. ശരിയായി അന്വേഷിച്ച് കുറ്റവാളികളെ പിടികൂടുമെന്ന് അദ്ദേഹം കൂട്ടിച്ചേര്‍ത്തു. പടക്കം തിന്നാന്‍ കൊടുത്ത് കൊല്ലുന്നത് ഇന്ത്യന്‍ സംസ്‌ക്കാരമല്ലെന്നും മന്ത്രി ട്വീറ്റില്‍ ഓര്‍മപ്പെടുത്തുന്നു.

Central Government has taken a very serious note of the killing of an elephant in Mallapuram, #Kerala. We will not leave any stone unturned to investigate properly and nab the culprit(s). This is not an Indian culture to feed fire crackers and kill.@moefcc @PIB_India @PIBHindi

— Prakash Javadekar (@PrakashJavdekar) June 4, 2020

കഴിഞ്ഞ ദിവസം മുന്‍കേന്ദ്രമന്ത്രിയും ബി.ജെ.പി നേതാവുമായ മനേകാ ഗാന്ധിയും മലപ്പുറത്തെ ഉന്നംവെച്ച് രംഗത്തെത്തിയിരുന്നു. മലപ്പുറം ഇത്തരം സംഭവങ്ങള്‍ക്ക് കുപ്രസിദ്ധമാണ്. പ്രത്യേകിച്ച് മൃഗങ്ങള്‍ക്കെതിരായ അതിക്രമങ്ങളില്‍ എന്നായിരുന്നു അവരുടെ ട്വീറ്റ്.

കഴിഞ്ഞ മേയ് 27ന് പാലക്കാട് ജില്ലയിലെ സൈലന്റ് വാലി ദേശീയോദ്യാനത്തിലായിരുന്നു ഗര്‍ഭിണിയായ ആന ചരിഞ്ഞത്. സംഭവത്തില്‍ വനം വകുപ്പ് കേസ് രജിസ്റ്റര്‍ ചെയ്തിട്ടുണ്ട്. വന്യജീവി സംരക്ഷണ നിയമപ്രകാരമാണ് കേസെടുത്തിട്ടുള്ളതെന്ന് മണ്ണാര്‍ക്കാട് ഫോറസ്റ്റ് റേഞ്ച് ഓഫിസര്‍ അറിയിച്ചതുമാണ്. കേസ് അന്വേഷിക്കാന്‍ മുഖ്യമന്ത്രി പ്രത്യേക സംഘത്തെയും ചുമതലപ്പെടുത്തിയിട്ടുണ്ട്.

ഇതെല്ലാം മറച്ചുവെച്ച് പാലക്കാട്ടെ സംഭവം മലപ്പുറത്തിന്റെ ചുമലില്‍ കെട്ടിവെക്കനാണ് ബി.ജെ.പി നേതാക്കളുടെ കുത്സിത ശ്രമം.