കോട്ടയം: വീട്ടമ്മയുടെ കൊലപാതകത്തിന് ശേഷം പ്രതി കൈക്കലാക്കിയ 28 പവന്‍ സ്വര്‍ണം കണ്ടെടുത്തു. പ്രതി മുഹമ്മദ് ബിലാല്‍ കൊലപാതകത്തിന് ശേഷം താമസിച്ചിരുന്ന കൊച്ചി ഇടപ്പള്ളിയിലെ വീട്ടില്‍ നിന്നാണ് സ്വര്‍ണം കണ്ടെത്തിയത്. കൊല്ലപ്പെട്ട ഷീബയുടെ 55 പവന്‍ സ്വര്‍ണമാണ് കാണാതായത്.

കോട്ടയത്ത് നിന്ന് എറണാകുളത്തെത്തിയ പ്രതിക്ക് പാചകം അറിയാം എന്നതിനാല്‍ എറണാകുളത്തെ ഒരു ഹോട്ടലില്‍ ജോലി ലഭിക്കുകയായിരുന്നു. അതേ ഹോട്ടലിലെ പാചകക്കാരന്‍ പെട്ടെന്ന് അവധിയിലായിരുന്നുവെന്നതും പ്രതി ബിലാലിന് മറ്റ് കാര്യങ്ങളൊന്നും അന്വേഷിക്കാതെ തന്നെ പെട്ടെന്ന് ജോലി ലഭിക്കാന്‍ കാരണമായി. അതുകൊണ്ടുതന്നെ ഇടപ്പള്ളി കുന്നുംപുറത്ത് ഒരു വീട്ടില്‍ താമസവും പെട്ടെന്ന് ശരിയായി. പ്രതിയുടെ കൂടെ ഇവിടെ വീട്ടില്‍ ഇതര സംസ്ഥാന തൊഴിലാളിയടക്കം താമസിക്കുന്നുണ്ട്. അതുകൊണ്ടുതന്നെ ആര്‍ക്കും സംശയം തോന്നാത്ത രീതിയിലായിരുന്നു പ്രതി ഒളിവില്‍ കഴിഞ്ഞത്.

ഇന്നാണ് പ്രതിയെ പിടികൂടിയത്. കാറുമായി പമ്പിലെത്തിയപ്പോഴുള്ള സിസിടിവി ദൃശ്യങ്ങളാണ് ഇയാളെ കുടുക്കിയത്. മോഷണം ലക്ഷ്യമിട്ടാണ് പ്രതി ദമ്പതിമാരെ ആക്രമിച്ചതെന്ന് ജില്ലാ പോലീസ് മേധാവി ജി.ജയ്‌ദേവ് പറഞ്ഞു.

പെട്ടെന്നുള്ള പ്രകോപനമാണ് കൊലക്ക് കാരണമെന്നാണ് പറയുന്നത്. തെളിവ് നശിപ്പിക്കാനായി പാചകവാതകസിലിണ്ടര്‍ തുറന്നുവിട്ടു. ഇയാള്‍ക്ക് ഈ കുടുംബം സ്ഥിരമായി സാമ്പത്തിക സഹായം നല്‍കാറുണ്ടായിരുന്നു. കുറ്റകൃത്യം നടത്തിയ ദിവസം വീട്ടില്‍ സന്ദര്‍ശനത്തിനെത്തിയിരുന്നു.അന്നും ഇയാള്‍ സാമ്പത്തിക സഹായം ആവശ്യപ്പെട്ടു. അത് നല്‍കാന്‍ കഴിയില്ലെന്ന് പറഞ്ഞതാണ് കൊലപാതകത്തിലേക്ക് നയിച്ചത്.

കോട്ടയം എസ്.പിയുടെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്. അന്വേഷണ സംഘം ഇയാളെ വിശദമായി ചോദ്യം ചെയ്തുവരികയാണ്. കൊലയ്ക്ക് പിന്നില്‍ കവര്‍ച്ച മാത്രമല്ല എന്ന സൂചന പൊലിസ് നേരത്തെതന്നെ നല്‍കിയിരുന്നു.

തിങ്കളാഴ്ച വൈകീട്ടാണ് കോട്ടയം താഴത്തങ്ങാടി പാറപ്പാടം ഷാനി മന്‍സില്‍ ഷീബ (60)യെ കൊല്ലപ്പെട്ടനിലയില്‍ കണ്ടെത്തിയത്. ഭര്‍ത്താവ് മുഹമ്മദ് സാലി (65) ഗുരുതരനിലയില്‍ കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്.