ഇസ്‌ലാമാബാദ്: പാകിസ്താനില്‍ രണ്ട് കൗമാരക്കാരായ ഹിന്ദു പെണ്‍കുട്ടികളെ തട്ടിക്കൊണ്ടുപോയി വിവാഹം കഴിപ്പിക്കുകയും മതംമാറ്റുകയും ചെയ്ത സംഭവത്തില്‍ ഏഴുപേര്‍ അറസ്റ്റില്‍. നികാഹിനു നേതൃത്വം കൊടുത്ത പാകിസ്താന്‍ സുന്നി തഹ്‌രീക് നേതാവ് കൂടിയായ മൗലവി ഉള്‍പ്പെടെയുള്ളവരാണ് അറസ്റ്റിലായത്. പെണ്‍കുട്ടികളെ വിവാഹം ചെയ്ത രണ്ടുയുവക്കളും പിടിയിലായവരില്‍ ഉള്‍പ്പെടും. എന്നാല്‍, ഇവരുടെ പേരുകള്‍ പുറത്തുവിട്ടിട്ടില്ല. ഏഴുപേരെയും ഉടന്‍ കോടതിയില്‍ ഹാജരാക്കുമെന്നും പൊലിസ് അറിയിച്ചു. സംഭവം അന്വേഷിക്കാനും പെണ്‍കുട്ടികളെ എത്രയും വേഗം കണ്ടെത്താനും പ്രധാനമന്ത്രി ഇമ്രാന്‍ ഖാന്‍ ഉത്തരവിട്ടതിനു പിന്നാലെയാണ് അവരുടെ അറസ്റ്റ്. തട്ടിക്കൊണ്ടുപോവല്‍, പ്രായപൂര്‍ത്തിയാവാത്ത പെണ്‍കുട്ടികളെ വിവാഹം കഴിക്കല്‍ തുടങ്ങിയ കേസുകളാവും ഇവര്‍ക്കെതിരെ ചുമത്തുക.
ഹോളിദിനത്തില്‍ സിന്ധ് പ്രവിശ്യയിലെ ഗോട്കിയില്‍ നിന്ന് പഞ്ചാബിലെ റീം യാര്‍ ഖാനിലേക്കാണ് രവീണ (13), റീന (15) എന്നീ സഹോദരിമാരെ തട്ടിക്കൊണ്ടുപോയത്. ഇവരെ കാണാതായതിനു പിന്നാലെ നികാഹ് നടന്നതിന്റെ വീഡിയോ ദൃശ്യങ്ങളും പ്രചരിച്ചിരുന്നു. കേസന്വേഷണത്തിന്റെ ഭാഗമായി ഗോട്കിയിലുള്ള പെണ്‍കുട്ടികളുടെ വീട്ടിലെത്തി അച്ഛന്‍ ഹരിലാലിന്റെ മൊഴി പൊലിസ് രേഖപ്പെടുത്തി. വീട്ടിലെത്തിയ ജില്ലാ പൊലിസ് മേധാവി, പെണ്‍കുട്ടികളെ എത്രയും വേഗം കണ്ടെത്തുമെന്ന് ഹരിലാലിന് ഉറപ്പുകൊടുത്തു. സിന്ധ് മന്ത്രി സയ്യിദ് ഉവൈസ് ഷായും ഹരിലാലിന്റെ വീട് സന്ദര്‍ശിച്ച് എല്ലാ പിന്തുണയും അറിയിച്ചു.

അതിനിടെ, സുരക്ഷയാവശ്യപ്പെട്ട് പെണ്‍കുട്ടികള്‍ ഇസ്‌ലാമാബാദ് ഹൈക്കോടതിയെ സമീപിച്ചു. പെണ്‍കുട്ടികള്‍ക്കു വേണ്ടി അച്ഛനും സിന്ധ് മുഖ്യമന്ത്രി, സിന്ധിലെയും പഞ്ചാബിലെയും പൊലിസ് മേധാവികള്‍, പാര്‍ലമെന്റംഗം രമേഷ് കുമാര്‍ എന്നിവരും മുഖേനയാണ് ഹരജി നല്‍കിയത്.