കണ്ണൂര്‍: കൈത്തറി മേഖലയില്‍ അടിസ്ഥാന സൗകര്യവും തൊഴില്‍ സുരക്ഷയും ഉറപ്പാക്കുമെന്ന് മുഖ്യമന്ത്രി പിണറായി വിജയന്‍. സംസ്ഥാന കൈത്തറി വികസന കോര്‍പറേഷന്‍ ലിമിറ്റഡ് (ഹാന്‍വീവ്) സുവര്‍ണ ജൂബിലി ആഘോഷങ്ങളുടെ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. എട്ടാംക്ലാസ് വരെയുള്ള സര്‍ക്കാര്‍, എയ്ഡഡ് സ്‌കൂളുകളിലെ വിദ്യാര്‍ഥികള്‍ക്കു കൈത്തറി യൂനിഫോം വിതരണം ചെയ്യാനാണ് സര്‍ക്കാര്‍ പദ്ധതി. യൂനിഫോം ഉല്‍പാദനത്തിലും വില്‍പനയിലും വര്‍ധനവ് വരുത്തും. ജയിലുകളിലെ തടവുകാരെക്കൂടി ഈ പദ്ധതിയില്‍ ഉള്‍പ്പെടുത്തും. കണ്ണൂര്‍, തിരുവനന്തപുരം സെന്‍ട്രല്‍ ജയിലുകളില്‍ തറികള്‍ സ്ഥാപിക്കും. ഹാന്‍വീവിന്റെ വിതരണ ശൃംഖലകളെ തമ്മില്‍ ബന്ധിപ്പിക്കുന്ന നെറ്റ്‌വര്‍ക്ക് സംവിധാനം യാഥാര്‍ഥ്യമാക്കും. പുതിയ തലമുറയെ ആകര്‍ഷിക്കാന്‍ വീട്ടിലെ തറി, കൈത്തറി ഗ്രാമം പദ്ധതി വിപുലമാക്കുമെന്നും നെയ്ത്തുകാരുടെ എണ്ണം പതിനായിരമാക്കുമെന്നും മുഖ്യമന്ത്രി പറഞ്ഞു. ചടങ്ങില്‍ മന്ത്രി എ.സി മൊയ്തീന്‍ അധ്യക്ഷനായി. നിര്‍ദിഷ്ട കൈത്തറി മ്യൂസിയം പദ്ധതി രേഖ മന്ത്രി കടന്നപ്പള്ളി രാമചന്ദ്രന്‍ പ്രകാശനം ചെയ്തു.

മേയര്‍ ഇ.പി ലത, എം.പിമാരായ പി.കെ ശ്രീമതി, കെ.കെ രാഗേഷ്, എം.എല്‍.എമാരായ സി. കൃഷ്ണന്‍, ടി.വി രാജേഷ്, എ.എന്‍ ഷംസീര്‍, ജില്ലാ പഞ്ചായത്ത് പ്രസിഡന്റ് കെ.വി സുമേഷ്, ഹാന്‍വീവ് ചെയര്‍മാന്‍ കെ.പി സഹദേവന്‍, കൈത്തറി തൊഴിലാളി ക്ഷേമനിധി ബോര്‍ഡ് ചെയര്‍മാന്‍ അരക്കന്‍ ബാലന്‍, കൈത്തറി വീവേഴ്‌സ് സൊസൈറ്റി അസോസിയേഷന്‍ പ്രസിഡന്റ് പി. ബാലന്‍, പി. ജയരാജന്‍, പി. സന്തോഷ് കുമാര്‍, കെ. മനോഹരന്‍, കെ. സുരേന്ദ്രന്‍, എം.എ കരീം, താവം ബാലകൃഷ്ണന്‍, കെ. സുധീര്‍ സംസാരിച്ചു.