മലപ്പുറം: ഹോം നഴ്‌സിങ് സ്ഥാപനങ്ങളും ഒപ്പം ചൂഷണങ്ങളും വര്‍ധിക്കുമ്പോഴും നിയന്ത്രിക്കാന്‍ നടപടിയില്ല. യാതൊരു രജിസ്‌ട്രേഷനുമില്ലാതെയാണ് വിവിധയിടങ്ങളില്‍ ഹോം നഴ്‌സിങ് സ്ഥാപനങ്ങള്‍ പ്രവര്‍ത്തിക്കുന്നത്.

സ്ഥാപനങ്ങള്‍ക്ക് രജിസ്‌ട്രേഷന്‍ ഏര്‍പ്പെടുത്താന്‍ സര്‍ക്കാര്‍ തലത്തില്‍ ശ്രമമുണ്ടായിരുന്നുവെങ്കിലും തുടര്‍ നടപടികളൊന്നുമുണ്ടായില്ല.

ഇതര സംസ്ഥാന തൊഴിലാളികളും ഈ മേഖലയില്‍ ജോലി ചെയ്യാന്‍ തുടങ്ങിയത് ചൂഷണങ്ങള്‍ വര്‍ധിക്കാനിടയാക്കിയിട്ടുണ്ട്. തമിഴ്‌നാട്, കര്‍ണാടക, മഹാരാഷ്ട്ര, വെസ്റ്റ് ബംഗാള്‍ എന്നിവിടങ്ങളില്‍ നിന്നുള്ള തൊഴിലാളികളാണ് ഈ മേഖലയില്‍ ജോലി ചെയ്യുന്നത്.

സാമ്പത്തിക സ്ഥിതി വിവരണ വകുപ്പിന്റെ സര്‍വേ റിപ്പോര്‍ട്ട് പ്രകാരം 593 ഹോം നഴ്‌സിങ് സ്ഥാപനങ്ങളാണ് സംസ്ഥാനത്തുള്ളത്.

പുകുതിയും സ്ഥാപിതമായത് കഴിഞ്ഞ അഞ്ച് വര്‍ഷത്തിനിടയിലാണ്. കൂടുതല്‍ സ്ഥാപനങ്ങളുള്ളത് എറണാകുളം ജില്ലയിലാണ്. 96. കുറവ് വായനാട്ടിലാണ്. ഏഴ് സ്ഥാപനങ്ങള്‍.

മലയാളികളുടെ കുടുംബ പശ്ചാത്തലത്തില്‍ വന്ന മാറ്റങ്ങള്‍ മൂലം പല വീടുകളിലും പ്രായമായവരുടെയും രോഗികളുടെയും പ്രസവിച്ചവരുടെയും പരിചരണത്തിന് ആളില്ലാത്ത അവസ്ഥയായി. ഇത് മുതലെടുത്താണ് ഹോം നഴ്‌സുമാരും ഇവരെ എത്തിക്കുന്ന ഏജന്‍സികളും വ്യാപകമായത്.

ആവശ്യക്കാര്‍ വര്‍ധിച്ചതോടെ ഹോം നഴ്‌സുമാര്‍ക്കിടയില്‍ കള്ളനാണയങ്ങളും കയറിവന്നു. വീടുകളിലും ഏജന്‍സികളിലും പീഡനത്തിനിരയായ നഴ്‌സുമാര്‍ ധാരാളമാണ്. പരിചരണത്തിനു നിന്ന വീടുകളില്‍നിന്ന് സ്വര്‍ണവും പണവും കവര്‍ന്ന് രക്ഷപ്പെട്ട കേസുകളും വിരളമല്ല.

ഏജന്‍സികളുടെ തട്ടിപ്പിനിരയായി പട്ടിണിയിലേക്കും അനാശാസ്യത്തിലേക്കും വീണുപോയവരുമുണ്ട്. 69 ശതമാനം സ്ഥാപനങ്ങളും പ്രവര്‍ത്തിക്കുന്നത് നഗരപ്രദേശങ്ങളിലാണ്. തദ്ദേശസ്ഥാപനങ്ങളുടെയോ മറ്റേതെങ്കിലും ഏജന്‍സികളുടേയോ അംഗീകാരമില്ലാത്ത സ്ഥാപനങ്ങളും ധാരാളമുണ്ട്. സര്‍വേ റിപ്പോര്‍ട്ട് പ്രകാരം 42 ശതമാനം സ്ഥാപനങ്ങള്‍ക്ക് മാത്രമെ തദ്ദേശ സ്ഥാപനങ്ങളില്‍ നിന്നുള്ള അംഗീകാരം ലഭിച്ചിട്ടുള്ളൂ.