കൊണ്ടോട്ടി: സംസ്ഥാന ഹജ്ജ് കമ്മിറ്റി വഴി തീര്‍ഥാടനത്തിന് പോകുന്ന വനിതാതീര്‍ഥാടകരുടെ മുഖമക്കനയില്‍ ദേശീയ പതാക ആലേഖനം ചെയ്ത പ്രത്യേക സ്റ്റിക്കര്‍ പതിക്കും. ഹജ്ജ് വേളയില്‍ കൂട്ടം തെറ്റിപ്പോയാല്‍ പെട്ടെന്ന് കണ്ടെത്തുന്നതിന് വേണ്ടിയാണ് വനിതകളുടെ മുഖമക്കനയില്‍ പ്രത്യേക സ്റ്റിക്കര്‍ പതിക്കുന്നത്. ഇന്ത്യയില്‍ നിന്ന് യാത്രതിരിക്കുന്ന വനിതാ തീര്‍ഥാടകരുടെ മക്കനയില്‍ സ്റ്റിക്കര്‍ പതിക്കുന്ന ഏക സംസ്ഥാനം കേരളമാണ്. രണ്ട് ദേശീയ പതാക ചിത്രം ആലേഖനം ചെയതതിനൊപ്പം കേരള സ്റ്റേറ്റ് ഹജ്ജ് കമ്മറ്റി എന്ന് ഇംഗ്ലീഷിലും,കേരളം എന്ന് മലയാളത്തിലും, ഇന്ത്യ എന്ന് ഇംഗ്ലീഷിലും, അറബിയിലും രേഖപ്പെടുത്തിയിട്ടുണ്ട്. ഇതോടൊപ്പം കവര്‍ നമ്പര്‍, മൊബൈല്‍ നമ്പര്‍ എന്നിവ എഴുതിച്ചേര്‍ക്കാന്‍ പ്രത്യേക ഇടവുമുണ്ട്.

കഴിഞ്ഞ വര്‍ഷം മുതലാണ് വനിതാ തീര്‍ഥാടകരുടെ മുഖമക്കനയില്‍ പ്രത്യേക സ്റ്റിക്കര്‍ പതിച്ചു തുടങ്ങിയത്.