മുംബൈ, ഹൈദരാബാദ്, ചെന്നൈ വിമാനത്താവളങ്ങള്‍ക്കാണ് ഭീഷണി
മുംബൈ: രാജ്യത്തെ മൂന്ന് പ്രധാന വിമാനത്താവളങ്ങളില്‍ നിന്ന്‌വിമാനം റാഞ്ചുമെന്ന ഭീഷണിയെത്തുടര്‍ന്ന് അതിജാഗ്രതാ നിര്‍ദേശം. മുംബൈ, ഹൈദരാബാദ്, ചെന്നൈ വിമാനത്താവളങ്ങളിലാണ് സുരക്ഷ ശക്തമാക്കിയത്.
ഈസ്റ്റര്‍ ദിനമായ ഇന്നലെ വിമാനം റാഞ്ചുമെന്ന് ചൂണ്ടിക്കാട്ടി മുംബൈ പൊലിസിനാണ് ഇ-മെയില്‍ സന്ദേശം ലഭിച്ചത്. അജ്ഞാത സ്ത്രീയാണ് ഇ-മെയില്‍ അയച്ചത്. സ്ത്രീയെ ഇതുവരെ കണ്ടെത്താനായിട്ടില്ലെന്നും ഇതുസംബന്ധിച്ച് അന്വേഷണം തുടങ്ങിയതായും പൊലിസ് അറിയിച്ചു. മുംബൈ പൊലിസിന് ലഭിച്ച സന്ദേശം ഉടന്‍തന്നെ സുരക്ഷാ വിഭാഗങ്ങള്‍ക്കും രഹസ്യാന്വേഷണ വിഭാഗങ്ങള്‍ക്കും നല്‍കി. ഇതേതുടര്‍ന്ന് വിമാനത്താവളങ്ങളില്‍ സുരക്ഷ ഏഴുമടങ്ങ് വര്‍ധിപ്പിക്കുകയായിരുന്നു.
വിമാനം റാഞ്ചാന്‍ ഒരുങ്ങുന്നവരില്‍ 23 പേര്‍ ഉണ്ടെന്നും ആറംഗ സംഘമാണ് ഇതിന്റെ ഗൂഢാലോചന നടത്തിയതെന്നുമാണ് ഇ-മെയില്‍ സന്ദേശത്തില്‍ പറയുന്നത്. ഭീഷണിയുടെ പശ്ചാത്തലത്തില്‍ വിമാനത്താവളങ്ങള്‍ക്ക് പുറമെ മെട്രോകളിലും സുരക്ഷ ശക്തമാക്കി. വിമാനം തട്ടിയെടുക്കാന്‍ തീവ്രവാദി സംഘടനകള്‍ ശ്രമിച്ചേക്കുമെന്ന ഇന്റലിജന്‍സ് റിപ്പോര്‍ട്ടുണ്ടെന്ന് വ്യോമയാന വൃത്തങ്ങള്‍ പറഞ്ഞു. വിമാനത്താവളങ്ങളിലെ സന്ദര്‍ശകരുടെ പ്രവേശനം പരിമിതപ്പെടുത്തുകയും യാത്രക്കാരുടെ ഹാന്‍ഡ് ലഗേജുകള്‍ അടക്കമുള്ള ലഗേജുകള്‍ സൂക്ഷ്മമായി പരിശോധിക്കാനും എയര്‍ലൈന്‍ കമ്പനികള്‍ക്ക് സുരക്ഷാ അധികൃതര്‍ നിര്‍ദേശം നല്‍കി.