പനാജി: അമേരിക്കയില്‍ ജനിച്ചു വളര്‍ന്ന ഇന്ത്യന്‍ വംശജനായ നമിത് ദേശ്പാണ്ഡെ ഇന്ത്യയുടെ അണ്ടര്‍ 17 ലോകകപ്പ് ടീമില്‍ ഇടം പിടിച്ചു. അമേരിക്കയിലെ ന്യൂജേഴ്‌സിയില്‍ സ്ഥിര താമസക്കാരായ മുംബൈ സ്വദേശികളുടെ മകനാണ് നമിത്.
ഓള്‍ ഇന്ത്യ ഫുട്‌ബോള്‍ അസോസിയേഷന്‍ എന്‍.ആര്‍.ഐകളായ ഇന്ത്യന്‍ താരങ്ങള്‍ക്ക് ടീമില്‍ കളിക്കാനുള്ള അവസരമൊരുക്കിയിരുന്നു. 50 ഓളം പേര്‍ അപേക്ഷിച്ചതില്‍ നിന്നാണ് നമിതിനെ തിരഞ്ഞെടുത്തത്. പ്രതിരോധ താരമായ നമിത് ഇന്ത്യന്‍ അണ്ടര്‍ 17 ടീമിന്റെ ബ്രസീല്‍ പര്യടനത്തില്‍ ടീമിനൊപ്പം ചേര്‍ന്നു. അടുത്ത മാസം മുതല്‍ ഇന്ത്യന്‍ ടീമിന്റെ യൂറോപ്യന്‍ പര്യടനം ആരംഭിക്കുകയാണ്. ഒക്ടോബര്‍ ആറ് മുതല്‍ 28 വരെയാണ് ഒരു മാസത്തോളം നീണ്ടു നില്‍ക്കുന്ന പര്യടനം. ലോകകപ്പിലെ മികച്ച പ്രകടനം ലക്ഷ്യമിട്ടാണ് കോച്ച് ലൂയീസ് ഡി മാറ്റോയുടെ നേതൃത്വത്തില്‍ ടീം പര്യടനത്തിനൊരുങ്ങുന്നത്. പോര്‍ച്ചുഗല്‍, സ്‌പെയിന്‍, ഇറ്റലി, ഹംഗറി ടീമുകള്‍ക്കെതിരേ ഇന്ത്യ സൗഹൃദ മത്സരം കളിക്കും.