ഫറോക്ക്: പുസ്തകങ്ങളില്‍നിന്നു വായിച്ചറിഞ്ഞ ബേപ്പൂര്‍ സുല്‍ത്താനെ അടുത്തറിയാന്‍ വിദ്യാര്‍ഥികള്‍ വൈലാലിലെ വീട്ടിലെത്തി. മീഞ്ചന്ത ഗവ. വൊക്കേഷനല്‍ ഹയര്‍സെക്കണ്ടറി സ്‌കൂളിലെ വിദ്യാര്‍ഥികളാണ് വിശ്വവിഖ്യാത സാഹിത്യകാരന്‍ വൈക്കം മുഹമ്മദ് ബഷീറിന്റെ വീട്ടിലെത്തിയത്.
ബഷീറിന്റെ മകന്‍ അനീസ് ബഷീര്‍ കുട്ടികളെ സ്വീകരിക്കുകയും ഇവരുടെ ചോദ്യങ്ങള്‍ക്ക് മറുപടി നല്‍കുകയും ചെയ്തു. ബഷീര്‍ എഴുതുവാനുപയോഗിച്ച പേന, കണ്ണട, ഗ്രാമഫോണ്‍, ചാരുകസേര, സാഹിത്യകൃതികള്‍ എന്നിവ വിദ്യാര്‍ഥികള്‍ക്ക് ബഷീറിന്റെ പേരമക്കളായ വസീം ബഷീര്‍, അസീം ബഷീര്‍, നസീം ബഷീര്‍ എന്നിവര്‍ പരിചയപ്പെടുത്തി കൊടുത്തു.
വിദ്യാലയത്തിലെ വിദ്യാരംഗം കലാസാഹിത്യ വേദിയിലെയും അറബി ക്ലബിലെയും അംഗങ്ങളുടെ നേതൃത്വത്തിലാണ് സന്ദര്‍ശനം നടത്തിയത്. എ. അബ്ദുല്‍ റഹീം ബഷീര്‍ അനുസ്മരണപ്രഭാഷണം നടത്തി. പി.ടി.എം മുസ്തഫ അധ്യക്ഷനായി. സ്‌കൂള്‍ പി.ടി.എ ഭാരവാഹികളായ എ.കെ ഉദീഷ് കുമാര്‍, ടി. സെക്കീര്‍, അധ്യാപകരായ എം. നജ്മ, ടി. വിപഞ്ചി, എന്‍.എം അമിത സംസാരിച്ചു.