തിരുവനന്തപുരം: സംസ്ഥാനത്ത് കൊവിഡ് - 19 ബാധിക്കുന്നവരുടെ എണ്ണമുയരുന്നതിനിടെ ആരോഗ്യ പ്രവര്‍ത്തകരെ രോഗം പിടികൂടുന്നത് നിശ്ശബ്ദ രോഗവ്യാപനത്തിന്റെ സൂചനയാണ് നല്‍കുന്നതെന്ന് വിദഗ്ധര്‍.
ഡോക്ടര്‍മാര്‍ ഉള്‍പ്പെടെ അഞ്ച് ആരോഗ്യ പ്രവര്‍ത്തകര്‍ക്കു കൂടി കൊവിഡ് സ്ഥിരീകരിച്ചതോടെ എല്ലാ ആരോഗ്യപ്രവര്‍ത്തകര്‍ക്കും സ്രവപരിശോധന നടത്തണമെന്ന ആവശ്യം ശക്തമാകുകയാണ്. ബുധനാഴ്ച മാത്രം രണ്ടു ഡോക്ടര്‍മാരുള്‍പ്പെടെ അഞ്ച് ആരോഗ്യപ്രവര്‍ത്തകരാണ് രോഗബാധിതരായത്. കോഴിക്കോട്ടെ സ്വകാര്യ ആശുപത്രിയിലെ ഡോക്ടര്‍ക്കു രോഗം ബാധിച്ചതെങ്ങനെയെന്ന് വ്യക്തമല്ല. കൊവിഡ് സ്ഥിരീകരിച്ച കാസര്‍കോട്ടെ കാഞ്ഞങ്ങാട് ജില്ലാ ആശുപത്രിയിലെ ഡോക്ടര്‍ സ്രവപരിശോധനാ സംഘത്തില്‍ അംഗമായിരുന്നു. കൊല്ലത്ത് പുനലൂര്‍ ആശുപത്രിയിലെ ആരോഗ്യപ്രവര്‍ത്തകനും കൊല്ലം കടയ്ക്കല്‍ ആശുപത്രിയിലെ രണ്ട് ആരോഗ്യപ്രവര്‍ത്തകര്‍ക്കും രോഗം ബാധിച്ചു.
സംസ്ഥാനത്ത് കൂടുതല്‍ ആരോഗ്യപ്രവര്‍ത്തകര്‍ രോഗബാധിതരാകുന്നത് ആശുപത്രിയിലെത്തുന്ന മറ്റു രോഗികളില്‍ നിന്നോ അവരോടൊപ്പം വരുന്നവരില്‍ നിന്നോ ആവാമെന്നാണ് വിദഗ്ധര്‍ പറയുന്നത്. മാത്രമല്ല സര്‍ക്കാര്‍, സ്വകാര്യ ആശുപത്രികളിലെയും പരിശോധനാ കേന്ദ്രങ്ങളിലെയും സുരക്ഷാ ഉപകരണങ്ങളുടെ ഗുണനിലവാരവും ലഭ്യതക്കുറവും ആരോഗ്യപ്രവര്‍ത്തകര്‍ക്കിടയില്‍ ആശങ്കയുയര്‍ത്തുന്നുമുണ്ട്. അതുകൊണ്ടാണ് കൊവിഡ് ഇതര ചികിത്സ നടത്തുന്നവരിലേക്കും പരിശോധന വ്യാപിപ്പിക്കണമെന്നും എല്ലാ ആരോഗ്യ പ്രവര്‍ത്തകര്‍ക്കും സ്രവ പരിശോധന വേണമെന്നും ആവശ്യമുയരുന്നത്.