ന്യൂഡല്‍ഹി: സാമ്പത്തിക പ്രതിസന്ധി രൂക്ഷമായിരിക്കേ, ജെറ്റ് എയര്‍വേസിന്റെ സ്ഥാപക ചെയര്‍മാന്‍ നരേഷ് ഗോയലും അദ്ദേഹത്തിന്റെ ഭാര്യ അനിതയും എര്‍വേസിന്റെ ഡയരക്ടര്‍ ബോര്‍ഡില്‍നിന്ന് രാജിവച്ചു.

സ്‌റ്റേറ്റ് ബാങ്ക് ഓഫ് ഇന്ത്യ 1500 കോടി രൂപ വായ്പ നല്‍കി വിമാനക്കമ്പനിയെ സഹായിക്കാമെന്ന് അറിയിച്ചതിനു പിന്നാലെയാണ് നരേഷ് ഗോയലും ഭാര്യയും ഡയരക്ടര്‍ ബോര്‍ഡില്‍നിന്ന് രാജിവച്ചത്.

വിമാനക്കമ്പനി വലിയ ബാധ്യതയാണ് നേരിടുന്നത്. നരേഷ് ഗോയലും ഭാര്യ അനിതയും 1993ല്‍ സ്ഥാപിച്ച വിമാനക്കമ്പനി ഇപ്പോള്‍ 9000 കോടിയിലധികം കടബാധ്യതയിലാണ് പ്രവര്‍ത്തിക്കുന്നത്.

അതേസമയം ഗോയലിന്റെയും ഭാര്യയുടെയും രാജി പ്രഖ്യാപനത്തിനു പിന്നാലെ നാഷണല്‍ സ്റ്റോക്ക് എക്‌സ്‌ചേഞ്ചില്‍ ജെറ്റിന്റെ ഓഹരിയില്‍ 15.46 ശതമാനം ഉയര്‍ന്നിട്ടുണ്ട്.