ഗൂഡല്ലൂര്‍: ഒഡീസ സംസ്ഥാനത്തു നിന്നു പരിശീലനത്തിന് എത്തിയ റെയ്ഞ്ചര്‍മാര്‍ക്ക് മുതുമലയില്‍ പരിശീലനം നല്‍കി.
ഒഡീസ സംസ്ഥാനത്തു നിന്ന് ഡി.എഫ്.ഒ പ്രണാപ്കുമാര്‍ മൊഹന്തിയുടെ നേതൃത്തില്‍ 52 പേരടങ്ങിയ റെയ്ഞ്ചര്‍മാര്‍ പരിശീലനത്തി.
ഇവര്‍ തെക്കെ ഇന്ത്യന്‍ സംസ്ഥാനങ്ങളില്‍ എത്തിയതിന്റെ ഭാഗമായാണ് മുതുമല കടുവാ സങ്കേതത്തിലെത്തിയത്. ആദ്യം കര്‍ണ്ണാടകയിലെ ബന്തിപ്പൂര്‍ കടുവാ സങ്കേതത്തില്‍ പരിശീലനം നേടിയ ശേഷം വനങ്ങളുടെ വികസനത്തെ കുറിച്ച് പഠിക്കാനാണ് മുതുമല സങ്കേതത്തില്‍ എത്തിയത്. തെപ്പക്കാട് റെയ്ഞ്ചര്‍ രാജേന്ദ്രന്റെ നേതൃത്വത്തിലുള്ള വനപാലകര്‍ ഒഡീസയില്‍ നിന്നെത്തിയ റെയ്ഞ്ചര്‍മാരെ വനത്തിനുള്ളിലേക്ക് കൂട്ടികൊണ്ടുപോയി.
വനസംരക്ഷണം, ജല സംഭരണം, കാട്ടുതീ തടയല്‍, വന്യ മൃഗങ്ങളെ നിരീക്ഷിക്കല്‍ തുടങ്ങിയവയെ കുറിച്ച് പരിശീലനം നല്‍കി. വൈകിട്ട് തെപ്പക്കാട് ആനവളര്‍ത്തു കേന്ദ്രത്തിലെത്തിയ ഇവര്‍ക്ക് ആനകളെ സംരക്ഷിക്കുന്നതിനെ കുറിച്ച് വിവരണം നല്‍കി. മുതുമലയിലെ പരിശീലനം കഴിഞ്ഞ് റെയ്ഞ്ചര്‍മാര്‍ വീണ്ടും ബന്തിപ്പൂരിലേക്ക് തന്നെ മടങ്ങി.