ജിദ്ദ: മലപ്പുറത്തെ ലോകസഭാ ഉപതെരഞ്ഞെടുപ്പ് ഐക്യ ജനാധിപത്യമുന്നണിക്കുണ്ടായ തകര്‍പ്പന്‍ ജയത്തെ ആഘോഷമാക്കി പ്രവാസികളും. മലപ്പുറത്തെ മുഴുവന്‍ കണക്കുകൂട്ടലുകളും തെറ്റിച്ച് സംസ്ഥാന ചരിത്രത്തിലെ രണ്ടാമത്തെ റിക്കാര്‍ഡ് ഭൂരിപക്ഷത്തിന് മുസ് ലിം ലീഗ് സ്ഥാനാര്‍ഥി പി.കെ കുഞ്ഞാലിക്കുട്ടി അവിശ്വസനീയമായ വിജയം കൈവരിച്ചതാണ് പ്രവര്‍ത്തകരെ അമിത ആഹ്ലാദത്തിലാക്കിയത്.

യു.ഡി.എഫ് അനുകൂല പ്രവാസി സംഘടനകളായ കെ.എം.സി.സി, ഒ.ഐ.സി.സി എന്നിവരുടേ നേതൃത്വത്തില്‍ വിവിധ ജി.സി.സി രാഷ്ട്രങ്ങളില്‍ വിപുലമായ രീതിയിലാണ് വിജയം ആഘോഷിച്ചത്.
അതിരാവിലെ മുതല്‍ തന്നെ മണ്ഡലത്തിലെ വോട്ടെണ്ണല്‍ സൂക്ഷ്മമായാണ് പ്രവാസികള്‍ ദൃശ്യ, ശ്രാവ്യ മാധ്യമങ്ങളിലൂടെയും സോഷ്യല്‍ മീഡിയ വഴിയും നിരീക്ഷിച്ചത്.

പ്രവൃത്തി ദിനമായിട്ടും രാവിലെ മുതല്‍ ബിഗ്‌സ്‌ക്രീനില്‍ വോട്ടെണ്ണല്‍ തത്സമയം കാണാന്‍ വിവിധ കേന്ദ്രങ്ങളില്‍ സൗകര്യമൊരുക്കിയിരുന്നു. ജിദ്ദ ശറഫിയ്യ ഇംബാല ഗാര്‍ഡനില്‍ പുലര്‍ച്ചെ അഞ്ചര മുതല്‍ ബിഗ് സ്‌ക്രീനില്‍ വോട്ടെണ്ണല്‍ തത്സമയം കാണാനുള്ള സംവിധാനമൊരുക്കിയിരുന്നു. മക്കയില്‍ കാക്കിയയിലെ കെ.എം.സി.സി ഓഡിറ്റോറിയത്തിലാണ് ബിഗ് സ്‌ക്രീന്‍ ഒരുക്കിയിരുന്നത്. റിയാദ് ഉള്‍പ്പെടെയുള്ള സഊദിയിലെ മറ്റു പ്രവിശ്യയിലും ഇതര നഗരങ്ങളുലും യുഡിഎഫ് പ്രവര്‍ത്തകര്‍ വിപുലമായ ഒരുക്കങ്ങള്‍ നടത്തിയിരുന്നു. ഇതിനു പുറമെ മലയാളികളുടെ നിയന്ത്രണത്തിലുള്ള ഭക്ഷണ ശാലകളിലും വ്യാപാര സ്ഥാപനങ്ങളിലും മാത്രമല്ല, മലയാളികള്‍ ഒത്തുകൂടുന്നിടത്തെല്ലാം ഫലം അറിയാനായി വെമ്പല്‍ കൊണ്ടു പ്രവാസികള്‍.

ജയം ഉത്സവ പ്രതീതിയാണ് പരക്കെ സൃഷ്ടിച്ചത്. അതേ സമയം അധിക പേരും ജോലി സ്ഥലങ്ങളില്‍ വെച്ച് തന്നെയാണ് വോട്ടെണ്ണലിന്റെ ഓരോ വിവരങ്ങളും അറിഞ്ഞത്.

ഉപതിരഞ്ഞെടുത്തില്‍ യുഡിഎഫ് വിജയിക്കുമെന്ന് ഉറച്ച വിശ്വാസത്തിലായിരുന്നു ഗള്‍ഫിലെ കെ.എം.സി.സി പ്രവര്‍ത്തകര്‍. മുസ്‌ലിം ലീഗിന്റെ ശക്തമായ മണ്ഡലത്തില്‍ കുഞ്ഞാലിക്കുട്ടിയുടെ വിജയാഹ്ലാദത്തിനുള്ള ഒരുക്കങ്ങള്‍ നേരത്തെ തന്നെ പൂര്‍ത്തിയാക്കി കാത്തിരിക്കുകയായിരുന്നു കെ.എം.സി.സിയുടെയും ഒ.ഐ.സി.സിയുടെയും പ്രവര്‍ത്തകര്‍. പല സ്ഥലങ്ങളിലും കെ.എം.സി.സിയുടെ യൂനിറ്റുകളുടെ നേതൃത്വത്തില്‍ മധുര പലഹാരങ്ങള്‍ വിതരം ചെയ്യുകയും ചെയ്തു.

അതേസമയം, മലപ്പുറത്ത് ഇടതുപക്ഷ മുന്നണിക്ക് പ്രതീക്ഷച്ച വലിയ മുന്നേറ്റം നടത്താന്‍ സാധിച്ചില്ലെന്നും ഇടതു അനുകൂല പ്രവാസി സംഘടന പ്രവര്‍ത്തകരെ ഏറെ നിരാശയിലാഴ്ത്തിയത്.