മലപ്പുറം: ഫാസിസം ജനകീയ പോസ്റ്റുമോര്‍ട്ടത്തിനു വിധേയമായ മലപ്പുറം ഉപതെരഞ്ഞെടുപ്പിലെ ഫലം മോദി സര്‍ക്കാരിനേറ്റ കനത്ത തിരിച്ചടി. ദശീയ കാഴ്ചപ്പാടുകളും കേന്ദ്രഭരണകൂടവും ഇത്രമേല്‍ ചര്‍ച്ചക്കുവെച്ച അങ്കത്തട്ടിലാണ് പി.കെ.കുഞ്ഞാലിക്കുട്ടി 171038വോട്ടിന്റെ ഭൂരിപക്ഷത്തിനു തെരഞ്ഞെടുക്കപ്പെട്ടത്. കേന്ദ്ര സര്‍ക്കാറിന്റെ ഭരണകൂട ഭീകരതയും സംഘ് പരിവാര്‍ രാഷ്ട്രീയവും ഉത്തരേന്ത്യന്‍ സംസ്ഥാനങ്ങളിലെ ബി.ജെ.പി ജയവുമെല്ലാം വിലയിരുത്തിയ സവിശേഷതയാണ് മലപ്പുറം തെരഞ്ഞെടുപ്പില്‍ പ്രതിഫലിച്ചത്.

യു.ഡി.എഫിനും എല്‍.ഡി.എഫിനും 2014ലെപാര്‍ലിമെന്റ് തെരഞ്ഞെടുപ്പിനും 2016ലെ നിയമസഭാ തെരഞ്ഞെടുപ്പിനേക്കാളും വോട്ടു വര്‍ദ്ധനവുണ്ടായ ഈ തെരക്കെട്ടപ്പില്‍ ബി.ജെ.പിക്കു ദയനീയമായമായ വോട്ടു ചോര്‍ച്ചയുണ്ടായി. കഴിഞ്ഞ ലോകസഭാ തെരഞ്ഞെടുപ്പില്‍ 64705 വോട്ടുണ്ടായിരുന്ന എന്‍.ഡി.എക്കു കേന്ദ്ര ഭരണം രണ്ടു വര്‍ഷം പിന്നിടുമ്പോള്‍ വോട്ടര്‍മാര്‍ വര്‍ദ്ധനവുണ്ടായിട്ടും 957 വോട്ടാണ് എന്‍.ഡി.എ മുന്നണിക്ക് അധികമായി കിട്ടിയത്.കഴിഞ്ഞ വര്‍ഷം നടന്ന നിയമസഭാ തെരഞ്ഞെടുപ്പില്‍ മലപ്പുറം ലോകസഭാമണ്ഡലത്തിലെ ഏഴു മണ്ഡലങ്ങളില്‍ ആകെ ലഭിച്ച 73447 വോട്ട് ഒരു വര്‍ഷം പിന്നിട്ടപ്പോഴേക്കും 65662 ആയി കുറഞ്ഞു.

ഒരു വര്‍ഷം കൊണ്ട് 7785 വോട്ടിന്റെ കുറവാണ് മണ്ഡലത്തിലുണ്ടായത്. ഒരു ലക്ഷത്തിലേറെ പുതിയ വോട്ടര്‍മാരോ ബി.ഡി.ജെ.എസ് ഉള്‍പ്പടെ മുന്നണി ഘടകകക്ഷികളുടെ സ്വാധീനമോയൊന്നും തെരഞ്ഞെടുപ്പില്‍ തുണച്ചിട്ടില്ല. കേരളത്തിലെ ഇരുമുന്നണികള്‍ക്കും ലോകസഭയിലും നിയമസഭയിലും ലഭിച്ച വോട്ടിംഗ് ശതമാനവും പുതിയ വോട്ടര്‍മാരുടെ എണ്ണവും കണക്കുകൂട്ടിയാല്‍, ബി.ജെ.പി 2014ല്‍ നിന്നും 2017 ലെത്തുമ്പോള്‍ വലിയ പരാജയമായി കാണുകയാണ്. അതേസമയം, കേരള രാഷ്ട്രീയത്തിലെ വലിയ ചലനമൊന്നും സൃഷ്ടിക്കാത്ത എന്‍.ഡി.എ ഈ തെരഞ്ഞെടുപ്പില്‍ പോസ്റ്റ്‌മോര്‍ട്ടത്തിനു വിധേയമമായതിലെ വസ്തുത മോദി സര്‍ക്കാറിനു ശേഷം രാജ്യം നേരിടുന്ന ദുരന്തം തിരിച്ചറിഞ്ഞു കൊണ്ടായിരുന്നു. മൂന്നു മുന്നണികളും പ്രചാരണത്തില്‍ മുന്നില്‍ വെച്ചത് ഇത്തവണ മോദി സര്‍ക്കാറിന്റെ നയങ്ങള്‍ തന്നെയായിരുന്നു എന്നതിനു ഇതാണ് കാരണം. യു.ഡി.എഫും എല്‍.ഡി.എഫും മല്‍സരിച്ചിടത്ത് ഫാസിസത്തിനെതിരെ കൂടുതല്‍ എതിര്‍പ്പ് ആര് എന്നതിന്റെ തോതാത് നിര്‍ണയിക്കപ്പെട്ടത്.

മുന്‍കാല തെരഞ്ഞെടുപ്പുകളില്‍ നിന്ന് വിഭിന്നമായി വികസന അജണ്ടകളേക്കാളുപരി ദേശീയ രാഷ്ട്രീയവും മതേതരത്വവും രാജ്യത്തിന്റെ പാരമ്പര്യവുമെല്ലാം താഴെ തട്ടില്‍ ചര്‍ച്ചാ വിധേയമാക്കിയെന്നതാണ് ഈ ഉപതെരഞ്ഞെടുപ്പിലെ സവിശേഷത.കേന്ദ്ര സര്‍ക്കാറിന്റെ ഫാസിസ്റ്റ് അജണ്ടകളെ യു.ഡി.എഫ് ,എല്‍.ഡി.എഫ് മുന്നണികള്‍ പ്രചാരണ രംഗത്ത് ഉപയോഗപ്പെടുത്തിയപ്പോള്‍ മോദി സര്‍ക്കാരിന്റെ വികസന നേട്ടം വിവരിച്ചും വിമര്‍ശനങ്ങള്‍ക്ക് മുപടി പറഞ്ഞുമാണ് ബി.ജെ.പി തെരഞ്ഞെടുപ്പിനെ നേരിട്ടത്. എന്നാല്‍ സര്‍ക്കാര്‍ നേട്ടങ്ങളെ മുന്നില്‍ വെക്കുന്നുവെന്ന തരത്തിലുള്ള ഓരോ അജണ്ടകളും പാര്‍ട്ടിക്ക് തിരിച്ചടിയാവുകയായിരുന്നു. സര്‍ക്കാറിന്റെ വൈകല്യങ്ങളും നയനിലപാടുകളിലെ ഒളിയജണ്ടകളും വിചാരണക്കു വെച്ച തെരഞ്ഞെടുപ്പില്‍ നേതൃനിരയിലെ പ്രമുഖല്ലൊം മുഴുസമയം മലപ്പുറത്ത് ക്യാംപ് ചെയ്താണ് ബി.ജെ.പി.നേതൃത്വം പ്രതിരോധത്തിനറങ്ങിയത്.മലപ്പുറത്തെ ഈ ജനകീയ വിചാരണക്കു മുന്നില്‍ പാര്‍ട്ടിവോട്ടുകളുടെ കുത്തൊഴുക്ക് തടയുകയെന്ന വെല്ലുവിളിയായിരുന്നു പ്രചാരണ രംഗത്ത് ബി.ജെ.പി അഭിമുഖീകരിച്ചതും.ആ പ്രചാരണമാണ് ഗണ്യമായ വോട്ടു ചോര്‍ച്ചക്കും അതിലുപരി പ്രചാരണ രംഗത്ത് രാഷ്ട്രീയ പ്രതിരോധത്തിനും കാരണമായത്.

കേന്ദ്ര സര്‍ക്കാറിനെതിരെയുള്ള മുഴുവന്‍ പ്രചാരണങ്ങളേയും ചെറുക്കാനിറങ്ങിയ പാര്‍ട്ടി നേതൃത്വം,ജയിച്ചാല്‍ കേന്ദ്രത്തില്‍ മലപ്പുറത്തിനു മന്ത്രി പദവിയെന്നതായിരുന്നുമുന്നോട്ടുവെച്ചമോഹന വാഗ്ദാനം. ഒരു വിഭാഗം നേതാക്കള്‍ ഭരണകൂടത്തെ വെട്ടില്‍ വീഴ്ത്തുന്ന നിലപാടുകളെ മറച്ചു പിടിച്ചാണ് വികസനവും മന്ത്രി വാഗ്ദാനവും പ്രചാരണ മാധ്യമമാക്കിയത്.അതേസമയം കെ.സുരേന്ദ്രന്റെ നേതൃത്വത്തിലുള്ള ഒരു വിഭാഗം നേതാക്കളാവട്ടെ, അതിവൈകാരികമായ പ്രകടനങ്ങളും അകത്തട്ടില്‍ നടത്തി അണികളെ ആവേശപ്പെടുത്താനും അവസാനം വരേ ശ്രമിച്ചു.മോദി സര്‍ക്കാരിന്റെനയങ്ങള്‍, ന്യുനപക്ഷങ്ങളോടുള്ള സമീപനം, മുസ്ലിം ദലിത് വിഭാഗങ്ങള്‍ക്കു നേരെ നടക്കുന്ന പീഢനങ്ങള്‍, ഏക സിവില്‍ കോഡ് തുടങ്ങിയവയെല്ലാം തെരഞ്ഞെടുപ്പ് പോരാട്ടത്തില്‍ ബി.ജെ.പിക്കു നേരെ ജനകീയ വെല്ലുവിളിയായി.

കാസര്‍കോഡ് ചുരിയില്‍ മതപണ്ഡിതനായ റിയാസ് മുസ്ലിയാര്‍, മലപ്പുറം കൊടിഞ്ഞിയില്‍ ഇസ്ലാം മതം സ്വീകരിച്ച ഫൈസല്‍ എന്നീ രണ്ടു പേരുടെ ധാരുണ കൊലപാതകമാണ് ബി.ജെ.പിക്ക് മലപ്പുറത്ത് വലിയ തിരിച്ചടിക്കു കാരണമായി.രണ്ടിടങ്ങളിലും സംഘ് പരിവാര്‍ നേതാക്കളും സജീവ സംഘാടകരും പ്രതികളായി പിടിക്കപ്പെട്ടതോടെ തെരഞ്ഞെടുപ്പ് അകത്തില്‍ പാര്‍ട്ടി പ്രതിരോധത്തിനു പാടുപെട്ടു. ഏക സിവില്‍ കോഡ് സ്വീകാര്യമല്ലെന്ന രാജ്യത്തിന്റെ മതേതര കാഴ്ചപ്പാടും ഈ തെരഞ്ഞെടുപ്പില്‍ പ്രധാനമായും പ്രതിഫലിച്ചിട്ടുണ്ട്. ബീഫ് കേരളത്തില്‍ ഒരു വിഷയമല്ലെന്ന തരത്തിലായിരുന്നു ബി.ജെ.പിയുടെ ആദ്യ ഘട്ട പ്രചാരം.ഇതിനിടെയായിരുന്നു, ജയിച്ചാല്‍ നല്ലയിനം ബീഫ് ലഭ്യമാക്കുമെന്ന സ്ഥാനാര്‍ഥിയുടെ പ്രഖ്യാപനവും. ഇതാടൊപ്പം തന്നെ ബി.ജെ.പി സംസ്ഥാന ജനറല്‍ സെക്രട്ടറി കെ.സുരേന്ദ്രന്റെ വെല്ലുവിളിയുമുണ്ടായി.

കേരളത്തിലും പശുവിനെ അറുക്കാന്‍ സമ്മതിക്കില്ലെന്നും അത്തരത്തില്‍ ധൈര്യമുണ്ടോയെന്ന വെല്ലുവിളിയും വിവാദമായതോടെ പാര്‍ട്ടി വെട്ടിലായി. ഇതൊന്നും താന്‍ കേട്ടിട്ടില്ലെന്നും ഇതു സംബന്ധമായി ചോദിക്കരുതെന്നായിരുന്നു പ്രസിഡന്റ് കുമ്മനം രാജശേഖരന്റെ നിലപാട്. ഉത്തരേന്ത്യയിലെ ബീഫ് വിവാദവും കൊലപാതകവും വിവാദമായപ്പോഴും, പാര്‍ട്ടി നേതാക്കള്‍ മലപ്പുറത്ത് പ്രശ്‌നത്തെ ലാഘവത്തോടെ കണ്ടതും വെല്ലുവിളിച്ചതും ഭീതി വളര്‍ത്തി. യു.പി തെരഞ്ഞെടുപ്പിനു ശേഷം മുഖ്യമന്ത്രിയായി തീവ്ര നേതാവ് യോഗിനാഥ് അധികാരമേറ്റടുത്ത ഉടനെ കൈകൊണ്ട നടപടികകളല്ലാം ഉപതെരഞ്ഞെടുപ്പില്‍ വോട്ടര്‍മാരെ സ്വാധീനിച്ചിട്ടുണ്ട്. കേരളത്തിലെ രാഷ്ട്രീയ പ്രബുദ്ധതതയില്‍ പ്രതിഫലിക്കുന്ന ഇത്തരം വിഷയങ്ങള്‍ ബി.ജെ.പിയും ഭയപ്പെട്ടിരുന്നു. ദേശീയ നേതാക്കളാരും പ്രചാരണത്തിനു വരാത്തത് ഇത്തരം വൈകാരികത തിരിച്ചടിയാകുമെന്നതിനാലാണെന്നും കരുതപ്പെടുന്നു.അതേസമയം മലപ്പുറം ഉപതെരഞ്ഞെടുപ്പ് കേന്ദ്ര സര്‍ക്കാരിന്റെ വിലയിരുത്തലാകുമെന്നു ബി.ജെ.പി.സംസ്ഥാന പ്രസിഡന്റ് മലപ്പുറത്ത് പറഞ്ഞിരുന്നു.പരാജയം സമ്മതിച്ച പാര്‍ട്ടി,കഴിഞ്ഞ തവണത്തേക്കാള്‍ ഏറെ ലഭിക്കുന്ന ഓരോ വോട്ടും മോദിയുടെ ഭരണ പ്രഭാവമായിരിക്കുമെന്നു അവകാശപ്പെടുകയും ചെയ്‌തെങ്കിലും വര്‍ദ്ധിച്ച വോട്ടു ലഭിച്ചില്ലെന്നു മാത്രമല്ല, നിലവിലുള്ള വോട്ട് തന്നെ ഗണ്യമായി നഷ്ടമായ മലപ്പുറം ഉപതെരഞ്ഞെടുപ്പ് ബി ജെ പിക്കും മോദി സര്‍ക്കാറിനും കനത്ത ആഘാതമാണ്.