പാറക്കടവ്: കൊടും ചൂടില്‍ സ്‌കൂളില്‍ പരീക്ഷക്കെത്തുന്ന വിദ്യാര്‍ഥികള്‍ക്കും ഇന്‍വിജലേറ്റര്‍മാര്‍ക്കും ശീതളപാനീയം ഒരുക്കി സ്റ്റുഡന്റ് പൊലിസ് കാഡറ്റുകള്‍. ഉമ്മത്തൂര്‍ എസ്.ഐ ഹയര്‍ സെക്കന്‍ഡറി സ്‌കൂള്‍ ഹൈസ്‌കൂള്‍ വിഭാഗം ആദ്യ ബാച്ചായ 97 ബാച്ചിന്റെ സഹായത്തോടെയാണ് പരീക്ഷക്കെത്തുന്നവര്‍ക്കായി കുടിനീര്‍ പദ്ധതിക്ക് തുടക്കം കുറിച്ചത്.
ഇതിന്റെ ഭാഗമായി ആയിരക്കണക്കിന് വിദ്യാര്‍ഥികള്‍ക്കാണ് എസ്.പി.സി കാഡറ്റുകള്‍ നാരങ്ങ വെള്ളം, ബത്തക്ക വെള്ളം തുടങ്ങിയ ശീതളപാനീയമൊരുക്കുന്നത്.
പ്ലസ് ടു വിദ്യാര്‍ഥികള്‍ക്കും എസ്.എസ്.എല്‍.സി വിദ്യാര്‍ഥികള്‍ക്കും പരീക്ഷയുടെ തുടക്കത്തിലും അവസാനത്തിലും ലഭിക്കുന്ന ഈ ദാഹജലം ഏറേ ആശ്വാസകരമാണ്. ആവശ്യാനുസരണം പരീക്ഷാ ഹാളിലും കാഡറ്റുകള്‍ ദാഹജലം എത്തിക്കും. എ.സി.പി.ഒ കെ. രജിനിയാണ് കാഡറ്റുകള്‍ക്ക് നേതൃത്വം നല്‍കുന്നത്. ഈ സ്‌കൂളിലെ പൊലിസ് കഡറ്റുകള്‍ നടത്തുന്ന ഇത്തരം പ്രവര്‍ത്തനങ്ങള്‍ ഏറേ മാതൃകാപരമെന്ന് ഇവിടെ ഡ്യൂട്ടിക്കായി എത്തിയ അധ്യാപകര്‍ സാക്ഷ്യപെടുത്തുന്നു.