റിയാദ്: സഊദിയില്‍ ആഭ്യന്തര മന്ത്രാലയം നടത്തിയ വേട്ടയില്‍ രണ്ടു ദിവസത്തിനുള്ളില്‍ ഏഴായിരത്തിലധികം കുറ്റവാളികള്‍ പിടിയില്‍. രാജ്യത്തിന്റെ മുക്കുമൂലകളില്‍ അരിച്ചു പെറുക്കിയാണ് വിവിധ കേസുകളിലെ കുറ്റവാളികളെ പിടികൂടിയത്. പിടിയിലായവരില്‍ നിന്നും ആയുധങ്ങള്‍, തോക്കുകള്‍, മദ്യം, മയക്കുമരുന്ന്, മോഷ്ടിക്കപ്പെട്ട വാഹനങ്ങള്‍ തുടങ്ങിയവ പിടിച്ചെടുത്തിട്ടുണ്ട്.

പിടിയിലായ 7189 പേരില്‍ 3918 പേരും വിദേശികളാണ്. 3269 പേര്‍ സഊദി പൗരന്മാരുമാണ്. പിടിച്ചെടുത്ത 601 വാഹനങ്ങളില്‍ 45 എണ്ണം മോഷ്ടിക്കപ്പെട്ടവയാണെന്ന് കണ്ടെത്തിയിട്ടുണ്ട്. സുരക്ഷാ പ്രശ്‌നങ്ങളുള്ള 30 വാഹനങ്ങളും ഇതിലുണ്ട്.

 പിടിച്ചെടുത്ത മറ്റു വസ്തുക്കളും ആയുധങ്ങളും ഇവയാണ്. 62 വൈറ്റ് വെപ്പണ്‍സ്, 10 റൈഫിളുകള്‍, 603 വെടിയുണ്ടകള്‍, 24 പിസ്റ്റളുകള്‍, യന്ത്രത്തോക്കുകള്‍, 16 ബാരല്‍ മദ്യം, 97 കുപ്പി മദ്യം, 642 നിരോധിത ഗുളികള്‍, കഞ്ചാവ്, 13 കിലോയിലധികം മയക്കുമരുന്ന് എന്നിവയാണ് പിടിച്ചെടുത്ത വസ്തുക്കള്‍.