കോഴിക്കോട്: ലോ കോളജില്‍ എസ്.എഫ്.ഐ- എ.ഐ.എസ്.എഫ്, കെ.എസ്.യു സംഘര്‍ഷത്തെ തുടര്‍ന്ന് രണ്ടു വിദ്യാര്‍ഥികള്‍ക്ക് പരുക്ക്. ഇവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസം കോളജ് യൂനിയന്‍ ഓഫിസിലെ പാര്‍ട്ടി ചിഹ്നങ്ങള്‍ മായ്ക്കാന്‍ പ്രിന്‍സിപ്പല്‍ നിര്‍ദേശം നല്‍കിയിരുന്നു. എസ്.എഫ്.ഐ ഇത് ചുവന്ന പെയിന്റ് ഉപയോഗിച്ച് മായ്ച്ചത് കെ.എസ്.യു പ്രവര്‍ത്തകര്‍ ചോദ്യം ചെയ്തിരുന്നു. ഇതേ തുടര്‍ന്നുള്ള അസ്വാരസ്യമാണ് ഇന്നലെ സംഘര്‍ഷത്തില്‍ കലാശിച്ചത്.
കോളജിലെ വിദ്യാര്‍ഥിനിയോട് അപമര്യാദയായി പെരുമാറിയതായ പരാതിയെ തുടര്‍ന്ന് യൂനിയന്‍ സെക്രട്ടറിയെ ചോദ്യം ചെയ്തതുമായി ബന്ധപ്പെട്ടാണ് ഇന്നലെ സംഘര്‍ഷമുണ്ടായത്. ഇതില്‍ എ.ഐ.എസ്.എഫ് യൂനിറ്റ് കമ്മിറ്റി അംഗം ഡെല്‍വിന്‍ അഗസ്റ്റിന്‍ (21), കെ.എസ്.യു പ്രവര്‍ത്തകന്‍ ജവാദ് (22) എന്നിവര്‍ക്കാണ് പരുക്കേറ്റത്. ഇവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
കോളജ് യൂനിയന്‍ ജനറല്‍ സെക്രട്ടറി വിഷ്ണു മനോഹരന്റെ നേതൃത്വത്തിലുള്ള സംഘം അക്രമിച്ചുവെന്നാണ് എ.ഐ.എസ്.എഫ് നേതാക്കളുടെ ആരോപണം. പ്രവര്‍ത്തകര്‍ക്ക് നേരെയുള്ള എസ്.എഫ്.ഐ അക്രമണം അവസാനിപ്പിക്കണമെന്ന് എ.ഐ.എസ്.എഫ് യൂനിറ്റ് കമ്മിറ്റി ആവശ്യപ്പെട്ടു. സംഭവത്തെ തുടര്‍ന്ന് അന്വേഷണത്തിന് പ്രിന്‍സിപ്പല്‍ തിലകാനന്ദന്‍ റിപ്പോര്‍ട്ട് തേടി. നടപടി ആവശ്യപ്പെട്ട് പ്രിന്‍സിപ്പലിനെ കെ.എസ്.യു പ്രവര്‍ത്തകര്‍ ഉപരോധിച്ചു. കോളജ് താല്‍ക്കാലികമായി അടച്ചു. ഹോസ്റ്റലിലെ വിദ്യാര്‍ഥികളോട് വീട്ടിലേക്ക് മടങ്ങാനും പ്രിന്‍സിപ്പല്‍ നിര്‍ദേശിച്ചു. സ്‌പെഷല്‍ ക്ലാസുകളും റദ്ദാക്കി. കാംപസില്‍ പൊലിസ് സുരക്ഷയും ശക്തമാക്കി.