ന്യൂഡല്‍ഹി: നിയന്ത്രണങ്ങളില്‍ ഇളവുകള്‍ പ്രഖ്യാപിക്കുന്നതിനിടെയും ഇന്ത്യയില്‍ കൊവിഡ് രോഗികളുടെ എണ്ണം വര്‍ധിക്കുന്നു.

 ഇന്നലെ രാവിലെ അവസാനിച്ച 24 മണിക്കൂറിനിടെ രാജ്യത്ത് 9,651 പേര്‍ക്കാണ് കൊവിഡ് സ്ഥിരീകരിച്ചത്. കഴിഞ്ഞ ദിവസങ്ങളിലും തുടര്‍ച്ചയായി എണ്ണായിരത്തിലേറെ പേര്‍ക്കു രോഗം സ്ഥിരീകരിച്ചിരുന്നു. കഴിഞ്ഞ ദിവസം 24 മണിക്കൂറിനിടെ 270 പേര്‍ മരിച്ചിട്ടുമുണ്ട്. ഇതോടെ മരണസംഖ്യ 6,348 ആയതായാണ് ഔദ്യോഗിക വിവരം. രാജ്യത്ത് കൊവിഡ് കേസുകള്‍ 2.27 ലക്ഷമായി വര്‍ധിച്ചിട്ടുമുണ്ട്. കൊവിഡ് രോഗികളുടെ എണ്ണത്തില്‍ നിലവില്‍ ലോകത്ത് ഏഴാം സ്ഥാനത്തുള്ള ഇന്ത്യ, വൈകാതെ ഇറ്റലിയെക്കൂടി മറികടന്ന് ആറാം സ്ഥാനത്തെത്തുമെന്നാണ് കണക്കുകൂട്ടപ്പെടുന്നത്. ഇറ്റലിയില്‍ 2.34 ലക്ഷം പേര്‍ക്കാണ് കൊവിഡ് സ്ഥിരീകരിച്ചിരിക്കുന്നത്.

രാജ്യത്ത് 1,10,960 പേര്‍ ചികിത്സയിലുള്ളതായും 1,09,461 പേര്‍ രോഗമുക്തരായതുമായാണ് സര്‍ക്കാര്‍ ഇന്നലെ വ്യക്തമാക്കിയിരിക്കുന്നത്.