കിഴിശ്ശേരി: കൊണ്ടോട്ടി-അരീക്കോട് റൂട്ടില്‍ സ്വകാര്യ ബസുകളില്‍ വിദ്യാര്‍ഥികളെ കയറ്റുന്നില്ലെന്ന് പരാതി. കുഴിമണ്ണ ഗവ. ഹയര്‍ സെക്കന്‍ഡറി സ്‌കൂള്‍, ഗണപത് എ.യു.പ സ്‌കൂള്‍, ഗവ. എല്‍.പി സ്‌കൂള്‍, ട്യൂഷന്‍ സെന്ററുകള്‍ തുടങ്ങി ഇരുപതോളം വിദ്യാഭ്യാസ സ്ഥാപനങ്ങള്‍ കിഴിശ്ശേരിയില്‍ പ്രവര്‍ത്തിക്കുന്നു. ഈ സ്ഥാപനങ്ങളില്‍ പഠിക്കുന്ന നൂറുകണക്കിന് വിദ്യാര്‍ഥികളാണ് പ്രതിസന്ധിയിലാകുന്നത്. യാത്രാ ദുരിതത്തിനെതിരെ കിഴിശ്ശേരി ടൗണ്‍ മുസ്ലിം യൂത്ത് ലീഗ് കമ്മിറ്റി കൊണ്ടോട്ടി ട്രാഫിക്ക് പൊലിസിന് പരാതി നല്‍കി. സ്‌കൂള്‍ ബസ് സ്റ്റോപ് പരിസരത്ത് പൊലിസിന്റെ നിരീക്ഷണം വേണമെന്നും വിദ്യാര്‍ഥികളെ കയറ്റാത്ത ബസുകള്‍ക്കെതിരെ നടപടിയെടുക്കണമെന്നും ടൗണ്‍ യൂത്ത് ലീഗ് ആവശ്യപ്പെട്ടു.