വടക്കഞ്ചേരി: മലയോര മേഖലയില്‍ കാട്ടാനശല്യം തടയാന്‍ കര്‍ശന നടപടി സ്വീകരിക്കാന്‍ തീരുമാനമായി. കാട്ടാനയിറങ്ങുന്ന വിവിധ പ്രദേശങ്ങള്‍ കെ. രാജന്‍ എം.എല്‍.എയും സംഘവും സന്ദര്‍ശനം നടത്തി. കഴിഞ്ഞ ദിവസം ആനയുടെ ആക്രമണത്തില്‍ പാത്രകണ്ടം രാജന് (42) പരുക്കേറ്റിരുന്നു. ഈ സാഹചര്യത്തിലാണ് തൃശൂര്‍ ജില്ലാ അതിര്‍ത്തി കൂടിയായ കൈതക്കല്‍ ഉറവ്, പാത്രകണ്ടം, പുല്ലംപരുത തുടങ്ങിയ പ്രദേശങ്ങളില്‍ എം.എല്‍.എയുടെ സന്ദര്‍ശനം.
ആനയിറങ്ങുന്ന പ്രദേശത്ത് ഉടന്‍ തന്നെ സൗരോജ വേലി സ്ഥാപിക്കാനും. ഇവ സംരക്ഷിക്കുന്നതിന് വേണ്ടി പ്രദേശവാസികളെ ഉള്‍പ്പെടുത്തി ജനകീയ കമ്മിറ്റിയും രൂപീകരിക്കും. കൂടാതെ പ്രദേശത്ത് തെരുവ് വിളക്ക് സ്ഥാപിക്കാനും തീരുമാനിച്ചു.
ജനങ്ങളുടെ ഭീതി അകറ്റുന്നതിന് വേണ്ടി പുല്ലംപരുതയില്‍ നാല് വാച്ചര്‍മാരെ വയര്‍ലെസ് സംവിധാനത്തോടു കൂടി വിന്യസിക്കാനും തീരുമാനമായി. പീച്ചി ഡി.എഫ്.ഒ.എ ഒ. സണ്ണി, റെയ്ഞ്ച് ഓഫിസര്‍ എന്‍.കെ അജയഘോഷ്, ഡെപ്യൂട്ടി റെയ്ഞ്ചര്‍ സെബാസ്റ്റ്യന്‍, ബീറ്റ് ഫോറസ്റ്റ് ഓഫിസര്‍മാരായ പി.എസ് പ്രശാന്ത്, എം.കെ സനില്‍, സി.കെ രാജേന്ദ്രന്‍, ഷിജു ജേക്കബ് എന്നിവരും എം.എല്‍.എ യോടൊപ്പം ഉണ്ടായിരുന്നു.