മീനങ്ങാടി: ദേശീയ, സംസ്ഥാന സ്‌കൂള്‍ കായികമേളകളിലായി പതിനാറോളം മെഡലുകള്‍. 55 സര്‍ട്ടിഫിക്കറ്റുകള്‍. ട്രാക്കിലും ഫീല്‍ഡിലും കൈയടികളും ട്രോഫികളും സര്‍ട്ടിഫിക്കറ്റുകളും വേണ്ടുവോളം നേടി. പക്ഷേ, നേട്ടങ്ങളുടെ സാക്ഷ്യപത്രങ്ങളൊഴികെ ജീവതത്തിനു നിറമേകാനാകാതെ ഉഴലുകയാണ് കാര്യമ്പാടി ഊരുക്കണ്ടി പണിയകോളനിയിലെ ശ്രീധരന്‍ എന്ന മുപ്പത്തിയഞ്ചുകാരന്‍.
ജില്ലാ, സംസ്ഥാന, ദേശീയ സ്‌പോര്‍ട്‌സ് മീറ്റുകളില്‍ പങ്കെടുക്കുകയും മികച്ച വിജയം നേടുകയും ചെയ്ത ശ്രീധരന്‍ ഇന്നു കൂലിപ്പണിക്കാരനാണ്. രോഗികളായ മാതാപിതാക്കളും ഭാര്യയും രണ്ടു കുട്ടികളുമടങ്ങുന്ന കുടുംബത്തിന്റെ അത്താണി. ട്രാക്കിലും ഫീല്‍ഡിലും വയനാടിനും കേരളത്തിനും അഭിമാന മുഹൂര്‍ത്തങ്ങള്‍ സമ്മാനിച്ച ശ്രീധരനു പക്ഷേ പഠനം തുടരാനോ ജോലി സമ്പാദിച്ച് കുടുംബത്തെ കരകയറ്റാനോ കഴിഞ്ഞില്ല. കുടുംബത്തിന്റെ ഇല്ലായ്മകള്‍ കാരണം പാതിവഴിയില്‍ പഠനം ഉപേക്ഷിക്കുകയായിരുന്നു ശ്രീധരന്‍.

1997ല്‍ എസ്.എസ്.എല്‍.സി പരീക്ഷ വിജയിച്ച് ചങ്ങനാശ്ശേരി സെന്റ് ബര്‍ക്കമന്‍സ് കോളജില്‍ പ്രീഡിഗ്രിക്ക് ചേര്‍ന്നു. വീട്ടുകാരുടെ ഇല്ലായ്മ അറിയുന്നതുകൊണ്ട് കിട്ടിയ മെഡലുകള്‍ വിറ്റും പഠനം തുടരാന്‍ ശ്രമിച്ചെങ്കിലും നടന്നില്ല. പഠനം തുടരാനാകില്ലെന്ന് ഉറപ്പായതോടെ നാട്ടിലേക്കു തിരിച്ചു. ശ്രീധരന്‍ അന്നു കെട്ടിയതാണ് കൂലിപ്പണിക്കാരന്റെ വേഷം. പിന്നീടിതുവരെ ട്രാക്കിലെ ഓളങ്ങള്‍ക്കൊപ്പം ഓടാന്‍ ഈ കായികതാരത്തിനു സാധിച്ചിട്ടില്ല.
തുടര്‍പഠനത്തിനും കായികമേഖലയിലെ നിലനില്‍പ്പിനും എന്തുചെയ്യണമെന്ന് പറഞ്ഞുതരാന്‍ ആരുമുണ്ടായിരുന്നില്ല. അതാണെന്റെ സ്വപ്നങ്ങള്‍ തകര്‍ത്തത്- ശ്രീധരന്‍ പറഞ്ഞു. തനിക്ക് അംഗീകാരമായി കിട്ടിയ സര്‍ട്ടിഫിക്കറ്റുകളെല്ലാം സൂക്ഷിച്ചുവയ്ക്കാനുള്ള സൗകര്യം പോലും വീട്ടിലില്ല. കുറേ മെഡലുകള്‍ നഷ്ട്ടപ്പെട്ടു. തനിക്കിനി ഒരു ജോലി കിട്ടാന്‍ ആരെയാണ് കാണേണ്ടതെന്ന് ശ്രീധരന്‍ നിറകണ്ണുകളോടെ ചോദിക്കുന്നു.

ശ്രീധരന്റെ കാര്യങ്ങളറിഞ്ഞ് മീനങ്ങാടി ജനമൈത്രി പൊലിസ് വേണ്ട നിര്‍ദേശങ്ങള്‍ നല്‍കുന്നുണ്ട്. പി.എസ്.സി പരീക്ഷ എഴുതാന്‍ ആവശ്യമായ സഹായങ്ങളാണ് പൊലിസ് നല്‍കുന്നത്. ജില്ലാ, സംസ്ഥാന സ്‌കൂള്‍ ഗെയിംസ്, മുപ്പത്തിയേഴാമത് കേരള ഗെയിംസ്, ജില്ലാ ഖൊ ഖൊ ചാംപ്യന്‍ഷിപ്പ്, ഹരിയാനയിലെ സ്‌കൂള്‍ ഗെയിംസ്, ഫെഡറേഷന്‍ മത്സരങ്ങള്‍, കേരള സംസ്ഥാന റൂറല്‍ സ്‌പോര്‍ട്‌സ്, ഏകലവ്യ കായികമേള, ഇന്റര്‍ സ്‌കൂള്‍ അത്‌ലറ്റിക് മീറ്റ്- ശ്രീധരന്റെ കഴിവുകള്‍ തെളിയിക്കപ്പെട്ട വേദികള്‍ നിരവധിയാണ്. കായികതാരങ്ങള്‍ക്ക് ജോലി ലഭിക്കാനുള്ള യോഗ്യതകളെല്ലാം ശ്രീധരനുണ്ട്. ഭാര്യ ശാരദ, മക്കളായ സ്‌നേഹ, ശ്രീനന്ദ, അച്ഛന്‍ അമ്മ അടങ്ങിയ കുടുംബത്തെ സംരക്ഷിച്ച് ജീവിതത്തിന്റെ രണ്ടറ്റം കൂട്ടിമുട്ടിക്കാന്‍ പാടുപെടുകയാണ് ഒരു കാലത്ത് കളം വാണ ഈ കായികതാരം.