തൃശൂര്‍: കത്തിക്കയറുന്ന വെയിലത്തും തെരഞ്ഞെടുപ്പ് ആവേശം ഒട്ടും ചോരാതെ ഒല്ലൂര്‍ മണ്ഡലത്തിലെ വിവിധ ഇടങ്ങളിലായിരുന്നു യു.ഡി.എഫ് സ്ഥാനാര്‍ഥി ടി.എന്‍ പ്രതാപന്റെ ഇന്നലത്തെ പര്യടനം.
കനത്ത ചൂടിനെപ്പോലും വകവയ്ക്കാതെ പരമാവധി വോട്ടര്‍മാരെ നേരില്‍ കാണുന്നതിനു വേണ്ടിയാണ് പാണഞ്ചേരി, മാടക്കത്തറ,നടത്തറ പുത്തൂര്‍ പഞ്ചായത്തുകളില്‍ പര്യടനം നടത്തിയത്.
കടകളില്‍ കയറി വോട്ടഭ്യര്‍ഥിച്ചുകൊണ്ടായിരുന്നു തുടക്കം. പിന്നിട് പുതുനഗര്‍ കോളനിയില്‍ താമസിക്കുന്ന 40ഓളം കുടുംബങ്ങളുടെ അടുത്തേക്കായിരുന്നു അടുത്ത സന്ദര്‍ശനം. കൈകളില്‍ പൂക്കളുമേന്തി സ്ത്രീകളും കുട്ടികളും അടങ്ങുന്ന സംഘം സ്ഥാനാര്‍ഥിയെ വരവേറ്റു. യാക്കോബായ സുറിയാനിപ്പള്ളിയില്‍ പിതാവിന്റെ ആശീര്‍വാദവും പ്രതാപന്‍ ഏറ്റുവാങ്ങി.