ന്യൂഡല്‍ഹി: ഡല്‍ഹിയിലെ സര്‍ക്കാര്‍, സ്വകാര്യ ആശുപത്രികളില്‍ ഡല്‍ഹി നിവാസികള്‍ക്ക് മാത്രമേ ചികിത്സ നല്‍കുകയുള്ളൂവെന്ന് ഡല്‍ഹി മുഖ്യമന്ത്രി അരവിന്ദ് കെജ് രിവാള്‍. ഡല്‍ഹി സര്‍ക്കാരിനു കീഴിലുള്ള 10,000 കിടക്കകള്‍ ഡല്‍ഹി നിവാസികള്‍ക്കായി നീക്കിവെക്കുമെന്നും അദ്ദേഹം പറഞ്ഞു.

അതേസമയം, ഡല്‍ഹിയിലെ ആശുപത്രികള്‍ മറ്റ് സംസ്ഥാനങ്ങളില്‍ നിന്നുള്ള ആളുകളാല്‍ നിറയുമെന്ന് കരുതി അടച്ചിരുന്ന അതിര്‍ത്തികള്‍ നാളെ മുതല്‍ തുറക്കുമെന്നും അദ്ദേഹം പറഞ്ഞു.

കേന്ദ്ര സര്‍ക്കാരിനു കീഴിലുള്ള ചികിത്സാ സൗകര്യങ്ങള്‍ എല്ലാവര്‍ക്കും ഉപയോഗിക്കാന്‍ കഴിയും. പ്രത്യേക ചികിത്സയുള്ള സ്വകാര്യ ആശുപത്രികള്‍ എല്ലാവര്‍ക്കും തുറക്കുമെന്നും മുഖ്യമന്ത്രി പറഞ്ഞു.

ഡല്‍ഹിയില്‍ രോഗികളുടെ എണ്ണം കഴിഞ്ഞ ഒരാഴ്ചയായി വര്‍ധിച്ചുകൊണ്ടിരിക്കുകയാണ്, ഓരോ ദിവസവും ആയിരത്തിലധികം രോഗികളുടെ വര്‍ധനയാണ് ഉണ്ടാവുന്നത്.  തലസ്ഥാനത്തെ ആകെ രോഗികളുടെ എണ്ണം ഇപ്പോള്‍ 27,000 കവിഞ്ഞു.

അഞ്ച് അംഗ ഡോക്ടര്‍മാരുടെ സമിതിയുടെ ഉപദേശപ്രകാരമാണ് തീരുമാനമെടുത്തതെന്ന് കെജ്രിവാള്‍ പറഞ്ഞു. ജൂണ്‍ അവസാനത്തോടെ ഡല്‍ഹിയ്ക്ക് 15,000 കിടക്കകള്‍ ചികിത്സയ്ക്കായി ആവശ്യമാണെന്ന് സമിതി വിലയിരുത്തി. മറ്റ് സംസ്ഥാനങ്ങളില്‍ നിന്നുള്ളവരെ പ്രവേശനം അനുവദിച്ചാല്‍ നിലവിലുള്ള 9,000 കിടക്കകള്‍ മൂന്ന് ദിവസത്തിനുള്ളില്‍ നിറയുമെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.

ആശുപത്രികളില്‍ കിടക്കകള്‍ ലഭ്യമല്ലെന്ന റിപ്പോര്‍ട്ടിനെത്തുടര്‍ന്ന് മുഖ്യമന്ത്രി ജനങ്ങളില്‍ നിന്ന് നിര്‍ദ്ദേശങ്ങള്‍ തേടിയിരുന്നു. പ്രതിസന്ധി അവസാനിക്കുന്നതുവരെ ആശുപത്രികള്‍ സംവരണം ചെയ്യണമെന്ന് 90 ശതമാനം നിവാസികളും നിര്‍ദ്ദേശിച്ചതായി കെജ്രിവാള്‍ പറഞ്ഞു.