തിരുവമ്പാടി: ഇന്നലെ മല വെള്ളപ്പാച്ചിലില്‍ ഉറുമിയില്‍ കാണാതായ ഹാനി റഹിമാന്റെ (17) മൃതദേഹം കണ്ടെത്തി. ഇരവഞ്ഞിപ്പുഴയില്‍ താഴെ തിരുവമ്പാടി കല്പായി കടവിനു സമീപത്തു നിന്നുമാണ് മൃതദേഹം കണ്ടെത്തിയത്.

ഇന്നലെ രാത്രി നിര്‍ത്തിവെച്ച ശേഷം ഇന്ന് രാവിലെ മുതല്‍ മൃതദേഹത്തിനായി തിരച്ചില്‍ നടത്തിവരികയായിരുന്നു.

മുക്കം ഫയര്‍ഫോഴ്‌സ് ഉദ്യോഗസ്ഥരുടെ നേതൃത്വത്തില്‍ ആയിരുന്നു തിരച്ചില്‍. തിരുവമ്പാടി പൊലിസും സമീപ പ്രദേശങ്ങളിലെ വിവിധ സന്നദ്ധ സേന ഗ്രൂപ്പുകളും തിരച്ചിലില്‍ പങ്കെടുത്തിരുന്നു.

തിരുവമ്പാടി പൊലിസ് സര്‍ക്കിള്‍ ഇന്‍സ്‌പെകടര്‍ ഷജു ജോസഫ്, താമരശ്ശേരി താലൂക്ക് തഹസില്‍ദാര്‍ സി മുഹമ്മദ് റഫീഖ്, തിരുവമ്പാടി ഗ്രാമ പഞ്ചായത്ത് അംഗങ്ങളായ റോബര്‍ട്ട് നെല്ലിക്കത്തെരുവില്‍, വിത്സന്‍ മാത്യു താഴത്തുപറമ്പില്‍ , തിരുവമ്പാടി വില്ലേജ് ഓഫീസര്‍ മാര്‍ട്ടിന്‍ എന്നിവര്‍ സ്ഥലത്ത് ക്യാമ്പ് ചെയ്ത് തിരച്ചിലിന് നേതൃത്വം നല്‍കി.

മൃതദേഹം അല്‍പ സമയത്തിനകം പുഴയില്‍ നിന്നെടുത്ത് ഇന്‍ക്വിസ്റ്റ് നടപടികള്‍ പൂര്‍ത്തിയാക്കിയ ശേഷം കോഴിക്കോട് മെഡിക്കല്‍ കോളേജ് ആശുപത്രിയിലേക്ക് പോസ്റ്റ്‌മോര്‍ട്ടത്തിനയക്കും.