മലപ്പുറം: രാവിലെ എട്ടിന് വോട്ടെണ്ണിത്തുടങ്ങിയതു മുതല്‍ തീരുന്നത് വരെ കുതിക്കുകയായിരുന്നു കുഞ്ഞാലിക്കുട്ടിയുടെ ഭൂരിപക്ഷം. ഓരോ റൗണ്ട്  എണ്ണിത്തീരുമ്പോഴും റോക്കറ്റ് വേഗതയിലാണ് ലീഡുനില കുതിച്ചത്. വോട്ടെണ്ണി തുടങ്ങി പത്ത് മിനുറ്റ് കഴിഞ്ഞ് ആദ്യസൂചനകള്‍ അറിഞ്ഞപ്പോള്‍ കുഞ്ഞാലിക്കുട്ടിയുടെ ലീഡ് 460 വോട്ട്. അടുത്ത മിനിറ്റില്‍ ആയിരത്തലേക്കുയര്‍ന്നു. അഞ്ചു മിനുറ്റ് കഴിഞ്ഞപ്പോഴേക്കും 2,700 ആയി. തുടര്‍ന്ന് ഓരോ മിനിറ്റിലും ആയിരവും അഞ്ഞൂറും വോട്ടുകളുടെ മുന്നേറ്റമാണ് യു.ഡി.എഫ് നടത്തിയത്. അരമണിക്കൂര്‍ കഴിഞ്ഞപ്പോള്‍ ലീഡ് ആറായിരം കടന്നു. രണ്ട് മിനുറ്റുകള്‍ക്കകം അത് പതിനായിരത്തിലേക്ക്. മഞ്ചേരി, മലപ്പുറം  മണ്ഡലങ്ങളില്‍ എല്‍.ഡി.എഫ് ഭരിക്കുന്ന പഞ്ചായത്തുകളില്‍ പോലും കുഞ്ഞാലിക്കുട്ടി  മുന്നേറുന്നു എന്ന വാര്‍ത്ത പുറത്തുവന്നതോടെ യു.ഡി.എഫ് പ്രവര്‍ത്തകരില്‍  ആത്മവിശ്വാസം വര്‍ധിപ്പിച്ചു. പച്ചക്കൊടികളും വാദ്യമേളങ്ങളുമായി  പ്രവര്‍ത്തകര്‍ വോട്ടെണ്ണല്‍ കേന്ദ്രമായ ഗവ. കോളജിന്റെ മുന്നില്‍  നിലയുറപ്പിച്ചു. ഒരു മണിക്കൂര്‍ പിന്നിട്ടപ്പോള്‍ കുഞ്ഞാലിക്കുട്ടി ഒരു ലക്ഷം വോട്ട് എന്ന കടമ്പ കടന്നു. ഭൂരിപക്ഷം കാല്‍ ലക്ഷം കടന്നു.   25 ശതമാനം വോട്ടുകള്‍  എണ്ണിത്തീര്‍ന്നപ്പോള്‍ സമയം 9.15. ഓരോ റൗണ്ട് എണ്ണിത്തീരുമ്പോഴും  ലീഡും ഒപ്പം യു.ഡി.എഫിന്റെ ആത്മവിശ്വാസവും വര്‍ധിച്ചുകൊണ്ടിരുന്നു.  
സമയം 9.20 ആയപ്പോഴേക്കും ലീഡ് അരലക്ഷം കവിഞ്ഞു. 9.45ന് എണ്ണിത്തീര്‍ന്ന  വോട്ടുകളില്‍ യു.ഡി.എഫിന് രണ്ട് ലക്ഷം വോട്ടുകള്‍ കിട്ടിയപ്പോള്‍ എല്‍.ഡി.എഫ്  സ്ഥാനാര്‍ഥിക്ക് 1.30 ലക്ഷം വോട്ടുകളാണ് കിട്ടിയത്. ബി.ജെ.പിക്ക് 25000  വോട്ടുകളും നേടി. പത്ത് മണിക്ക് പകുതി വോട്ടുകള്‍ എണ്ണിക്കഴിഞ്ഞപ്പോള്‍  ഭൂരിപക്ഷം ഒരുലക്ഷം കവിഞ്ഞിരുന്നു. 11.30 ആയപ്പോള്‍ ഭൂരിപക്ഷം ലീഡ് 1.70  ലക്ഷമായി. അവസാനം 12 മണിക്ക് തെരഞ്ഞെടുപ്പ് കമ്മിഷന്‍ 1,71,038 വോട്ടിന്റെ  ഭൂരിപക്ഷത്തിന് കുഞ്ഞാലിക്കുട്ടി വിജയിച്ചതായി ഔദ്യോഗികമായി  സ്ഥിരീകരിച്ചു.