ശ്രീനഗര്‍: ജമ്മു കശ്മിരിലെ ഷോപ്പിയാനില്‍ തീവ്രവാദികളും സൈന്യവുമായി ഏറ്റുമുട്ടല്‍. ഇന്നലെ ഉച്ചയ്ക്ക് ആരംഭിച്ച ഏറ്റുമുട്ടലില്‍ വെടിവയ്പില്‍ അഞ്ചു തീവ്രവാദികള്‍ കൊല്ലപ്പെട്ടതായാണ് വിവരം. ഇന്നലെ വൈകിയാണ് ഏറ്റുമുട്ടല്‍ അവസാനിച്ചതെന്നാണ് വിവരം.
ജയ്‌ഷേ മുഹമ്മദ്, ഹിസ്ബുല്‍ മുജാഹിദീന്‍ വിഭാഗങ്ങളിലെ തീവ്രവാദികളാണ് കൊല്ലപ്പെട്ടത്. ഹിസ്ബുല്‍ മുജാഹിദീന്‍ കമാന്‍ഡര്‍ ഫാറൂഖ് അസദും കൊല്ലപ്പെട്ടവരില്‍ ഉള്‍പ്പെടും. വന്‍ ആയുധശേഖരവും പിടിച്ചെടുത്തിട്ടുണ്ട്.
ഷോപ്പിയാനിലെ റെബാനില്‍ ഇന്നലെ രാവിലെ സൈന്യം പട്രോളിങ്ങിനിറങ്ങിയിരുന്നു. തീവ്രവാദി സാന്നിധ്യം മനസിലാക്കിയതോടെ തിരച്ചില്‍ ആരംഭിച്ചു. ഇതോടെ കല്ലേറും ഏറ്റുമുട്ടലുമുണ്ടാകുകയായിരുന്നെന്നാണ് അധികൃതര്‍ വ്യക്തമാക്കുന്നത്. തുടര്‍ന്നു കൂടുതല്‍ സൈന്യം പ്രദേശത്തെത്തുകയും ഇവിടത്തെ ഇന്റര്‍നെറ്റ് കണക്ഷന്‍ വിച്ഛേദിക്കുകയും ചെയ്തു. ആര്‍മിക്കു പുറമേ, സി.ആര്‍.പി.എഫ്, ഷോപ്പിയാന്‍ പൊലിസ് അംഗങ്ങളും ഏറ്റുമുട്ടലില്‍ പങ്കെടുത്തു.ബാരാമുള്ളയില്‍ കഴിഞ്ഞ ദിവസം നടന്ന തീവ്രവാദി ആക്രമണത്തില്‍ ഒരാള്‍ വെടിയേറ്റ് മരിച്ചിട്ടുണ്ട്. 25കാരനായ ഇഷ്ഫാഖ് അഹമ്മദ് നജാറാണ് തീവ്രവാദികളുടെ വെടിയേറ്റ് മരിച്ചത്.