ബമാകോ: മാലിയില്‍ കഴിഞ്ഞദിവസം 29 ഗ്രാമീണരെ കൊലപ്പെടുത്തിയത് സൈന്യമാണെന്ന ആരോപണം ശക്തമായതോടെ ഇതു സംബന്ധിച്ച് അന്വേഷണം നടത്തുമെന്ന് സര്‍ക്കാര്‍ അറിയിച്ചു. വെള്ളിയാഴ്ചയാണ് സൈനിക യൂനിഫോമിലെത്തിയ സംഘം ബിനെദാമ എന്ന ഫുലാനി ഗ്രാമത്തിലെ ഗ്രാമമുഖ്യനടക്കമുള്ളവരെ കൊലപ്പെടുത്തിയത്. രണ്ടു സ്ത്രീകളും ഒരു ഒന്‍പതു വയസുകാരിയും കൊല്ലപ്പെട്ടവരില്‍ പെടും. സ്ത്രീകളടക്കം ഗ്രാമീണരെ കടുത്ത പീഡനത്തിനിരയാക്കുകയും വീടുകള്‍ കത്തിക്കുകയും ചെയ്തു. ആക്രമണം നടന്ന കാര്യം പ്രാദേശിക ഉദ്യോഗസ്ഥരും സ്ഥിരീകരിച്ചിട്ടുണ്ട്. സൈന്യത്തിന്റെ പങ്ക് നിഷേധിക്കാന്‍ പ്രതിരോധമന്ത്രി ഇബ്‌റാഹീം ദാഹിറോയും തയാറായില്ല.