കോഴിക്കോട്: ഒരു ദിവസത്തെ കൂലിയുമായി ബന്ധപ്പെട്ട് സമരം ചെയ്യുകയും അത് അനിശ്ചിതകാലമാക്കി നീട്ടി കോംട്രസ്റ്റ് നെയ്ത്ത് ഫാക്ടറി പൂട്ടിക്കുകയും ചെയ്തവര്‍ ഇപ്പോള്‍ ആ ഭൂമി കൈക്കലാക്കാന്‍ ശ്രമിക്കുകയാണെന്ന് ഗ്രോ വാസു പറഞ്ഞു. കോംട്രസ്റ്റിലെ തൊഴിലാളിയായിരുന്ന വാസു സമരത്തിന്റെ അട്ടിമറിയെക്കുറിച്ച് സംസാരിക്കവെയാണ് ഇങ്ങിനെ പ്രതികരിച്ചത്.
ഫാക്ടറിയിലെ നിസാരമായ ഒരു പ്രശ്‌നം വലുതാക്കി അനിശ്ചിതകാല സമരം നടത്തി അറനൂറോളം തൊഴിലാളികളെ വഴിയാധാരമാക്കിയവര്‍ ഇന്ന് സമരത്തിന്റെ ലക്ഷ്യം പോലും മറന്നുവെന്ന് അദ്ദേഹം പറഞ്ഞു.
എ.ഐ.ടി.യു.സി ആരംഭിച്ച സമരം പിന്നീട് സി.ഐ.ടിയുവിന്റെ നേതൃത്വത്തില്‍ അനിശ്ചിതകാലമായി മാറ്റുകയായിരുന്നു. ഇവരിപ്പോള്‍ കോംട്രസ്റ്റിനെ ചരിത്രസ്മാരകമാക്കണമെന്നാവശ്യപ്പെടുകയാണ്. കേരളത്തില്‍ ട്രേഡ് യൂനിയന്‍ രംഗത്താണ് എറ്റവും വലിയ അഴിമതി നടക്കുന്നതെന്നും ഗ്രോ വാസു ആരോപിച്ചു.