പട്‌ന: ബിഹാറിലെ ബെഗുസരായിയില്‍ ജെ.എന്‍.യു വിദ്യാര്‍ഥി നേതാവായ സി.പി.ഐ സ്ഥാനാര്‍ഥി കനയ്യകുമാറിനെതിരേ മത്സരിക്കാനില്ലെന്ന് അറിയിച്ച് ബി.ജെ.പി നേതാവും കേന്ദ്രമന്ത്രിയുമായ ഗിരിരാജ് സിങ്. നേരത്തെ നവാഡയില്‍ നിന്ന് ഗിരിരാജ് ജനവിധി തേടുമെന്നായിരുന്നു കരുതിയിരുന്നത്. എന്നാല്‍, ബെഗുസരായിയിലേക്കു മാറ്റിയതില്‍ പരസ്യമായി എതിര്‍പ്പ് പ്രകടിപ്പിച്ച അദ്ദേഹം, പാര്‍ട്ടിയുടെ നടപടി തന്റെ ആത്മാഭിമാനത്തെ മുറിപ്പെടുത്തിയതായി ആരോപിച്ചു. സംസ്ഥാനത്ത് സിറ്റിങ് സീറ്റില്‍നിന്നു തഴയപ്പെട്ട ഏക എം.പി താനാണ്. വലിയ ഭൂരിപക്ഷത്തിലാണ് താന്‍ നവാഡയില്‍ നിന്ന് ലോക്‌സഭയിലേക്കു വിജയിച്ചത്. തന്റെ പ്രവര്‍ത്തനങ്ങളെ നവാഡയിലെ ജനങ്ങള്‍ ചോദ്യംചെയ്താല്‍ മാത്രമേ മണ്ഡലം മാറുന്ന കാര്യം ആലോചിക്കൂവെന്നും അദ്ദേഹം വാര്‍ത്താ ഏജന്‍സി എ.എന്‍.ഐയോടു പറഞ്ഞു. എന്തുകൊണ്ടാണ് ബെഗുസരായില്‍ തന്നെ ഞാന്‍ മത്സരിക്കണമെന്ന് പാര്‍ട്ടി ആവശ്യപ്പെടുന്നത്?-അദ്ദേഹം ചോദിച്ചു.
കോണ്‍ഗ്രസും ആര്‍.ജെ.ഡിയും നേതൃത്വം നല്‍കുന്ന വിശാലമതേതരസഖ്യവും മത്സരരംഗത്തുള്ള ഇവിടെ കനയ്യകൂടി എത്തിയതോടെ ശക്തമായ ത്രികോണമത്സരമാണ് നടക്കാനിരിക്കുന്നത്. യുവാക്കളുടെയും സാമുദായിക വോട്ടുകളിലും ഉണ്ടാവുന്ന ധ്രുവീകരണം തനിക്കു തിരിച്ചടിയാവുമെന്ന ഭീതിയാണ് മണ്ഡലം വേണ്ടെന്നു വയ്ക്കാന്‍ ഗിരിരാജിനെ പ്രേരിപ്പിക്കുന്നത്. തന്റെ സമുദായാംഗമായ ഭൂമിഹാര്‍ വിഭാഗത്തില്‍പ്പെട്ടയാളാണ് കനയ്യ.
ഇത് ഈ വിഭാഗത്തിന്റെ വോട്ട് പിളരാന്‍ കാരണമാകുമെന്നും ഹിരിരാജ് കണക്കുകൂട്ടുന്നു. നവാഡയില്‍ തന്നെ താന്‍ മത്സരിക്കുമെന്നും അദ്ദേഹം മുന്നറിയിപ്പ് നല്‍കിയിട്ടുണ്ട്. അനുനയിപ്പിക്കാനെത്തിയ സംസ്ഥാനത്തെ മുതിര്‍ന്ന നേതാക്കളെ അദ്ദേഹം ചീത്തവിളിച്ചു ഇറക്കിവിടുകയായിരുന്നു.
എന്നാല്‍, തനിക്കെതിരേ മത്സരിക്കാന്‍ ഗിരിരാജിനെ കനയ്യകുമാര്‍ വെല്ലുവിളിച്ചു. 'ബെഗുസരായിയിലേക്കു വണക്കം' എന്ന് അദ്ദേഹത്തെ അഭിവാദ്യംചെയ്ത കനയ്യ, എല്ലാവരെയും പാകിസ്താനിലേക്ക് അയക്കാന്‍ ധൃതി കാണിക്കുന്ന നേതാവിനു ബെഗുസരായിയിലേക്കു വരാന്‍ പേടിയാണെന്നും പരിഹസിച്ചു. പ്രകോപനപരമായ പ്രസ്താവനകളിലൂടെ വിവാദനായകനായ ഗിരിരാജ്, നരേന്ദ്രമോദിയെ എതിര്‍ക്കുന്നവരും ബീഫ് കഴിക്കാന്‍ ആഗ്രഹിക്കുന്നവരും പാകിസ്താനിലേക്കു പോവണമെന്ന് ആവശ്യപ്പെട്ടിരുന്നു. ഇതുള്‍പ്പെടെയുള്ള അദ്ദേഹത്തിന്റെ പ്രസ്താവനകള്‍ ചൂണ്ടിക്കാട്ടിയാണ് കനയ്യയുടെ പരിഹാസം.