ചീമേനി: സാമൂഹ്യ വിരുദ്ധരുടെ കേന്ദ്രമായി മാറിയിരിക്കുകയാണ് കാക്കടവ് - പത്തായപ്പാറ റോഡരികിലെ സര്‍ക്കാര്‍ കെട്ടിടം. വര്‍ഷങ്ങള്‍ക്ക് കാക്കടവ് അണക്കെട്ട് നിര്‍മാണവുമായി ബന്ധപ്പെട്ടാണ് ഉദ്യോഗസ്ഥര്‍ക്ക് പദ്ധതി പ്രദേശത്ത് താമസിക്കാനുള്ള സൗകര്യത്തിനായി കെട്ടിടം പണിതത്.
എന്നാല്‍ പ്രദേശവാസികളുടെ കടുത്ത പ്രതിഷേധത്തെ തുടര്‍ന്ന് കാക്കടവില്‍ വലിയ അണക്കെട്ട് പദ്ധതി ഉപേക്ഷിക്കുകയായിരുന്നു. ഇതിനെ  തുടര്‍ന്നാണ് പദ്ധതിയാവശ്യത്തിനായി ഏറ്റെടുത്ത  25 ഏക്കറോളം വരുന്ന കൃഷിഭൂമിയും   തൊഴിലാളികള്‍ക്കും ഉദ്യോഗസ്ഥര്‍ക്കും  താമസിക്കാനായി പണിത ക്വാര്‍ട്ടേഴ്‌സും വെറുതെയായത്.  ഇടക്കാലത്ത് കുടിവെള്ള പദ്ധതിയുടെ തൊഴിലാളികള്‍ അനധികൃതമായി താമസിക്കാറുണ്ടെങ്കിലും  ഉപയോഗശൂന്യമായ കെട്ടിടം നിലവില്‍ സാമൂഹ്യ വിരുദ്ധരുടെ താവളമായി മാറിയിരിക്കുകയാണെന്ന് നാട്ടുകാര്‍ ആരോപിക്കുന്നു. തകര്‍ന്നു വീഴാനായ കെട്ടിടം പൊളിച്ച് മാറ്റണമെന്നാണ് നാട്ടുകാരുടെ ആവശ്യം.
കൃഷിഭൂമിയാകട്ടെ  കാടുമൂടിയ നിലയിലുമാണ്.  മദ്യപാനികളുടെയും മറ്റു സാമൂഹ്യ വിരുദ്ധരുടെയും ശല്യം കാരണം സമീപവാസികള്‍ക്ക് രാത്രി കാല യാത്രകള്‍ക്കും മറ്റും വലിയ പ്രയാസം നേരിടേണ്ടി വരുന്നുണ്ട്. കാക്കടവ് ടൗണില്‍ സാമൂഹ്യ വിരുദ്ധര്‍ കടകള്‍ അക്രമിക്കുന്നതും പരസ്പരം അടിപിടികൂടുന്നതും കൂടി വരികയാണ്. വിഷുത്തലേന്നും പ്രദേശത്തെ കടകള്‍ക്ക് നേരെ അക്രമം നടന്നിരുന്നു.
പൊലിസ് ശക്തമായ നടപടികളെടുക്കാത്തത് ഇത്തരക്കാര്‍ക്ക് കൂടുതല്‍ സ്വാതന്ത്ര്യം ലഭിക്കുന്നതായി കടയുടമകള്‍ ആരോപിക്കുന്നു.