നാദാപുരം: നാദാപുരം മേഖലകളില്‍ യു.ഡി.എഫ് സ്ഥാനാര്‍ഥി കെ. മുരളീധരന്‍ നടത്തിയ കാംപസ് പര്യടനം ആവേശമായി. ഒന്നാം ഘട്ട പര്യടനത്തിന്റെ ഭാഗമായാണ് കോളജുകള്‍ സന്ദര്‍ശിച്ചത്. വാണിമേലില്‍ പ്രവര്‍ത്തിക്കുന്ന നാദാപുരം ഗവണ്‍മെന്റ് കോളജിലായിരുന്നു സന്ദര്‍ശനത്തിന്റെ തുടക്കം.
വാടക കെട്ടിടത്തില്‍ പ്രവര്‍ത്തിക്കുന്ന കോളജിന്റെ ശോചനീയാവസ്ഥ വിദ്യാര്‍ഥികള്‍ മുരളീധരന്റെ മുന്നില്‍ വിവരിച്ചു. എല്ലാം പരിഹരിക്കാമെന്ന ഉറപ്പ് വിദ്യാര്‍ഥിക ള്‍ക്ക് നല്‍കിയാണ് സ്ഥാനാര്‍ഥി കാംപസ് വിട്ടത്. പിന്നീട് എം.ഇ.ടി , മലബാര്‍ വിമന്‍സ് കോളജ്, പുളിയാവ് നാഷനല്‍ കോളജ്, ദാറുല്‍ ഹുദാ, ഹൈടെക് കല്ലാച്ചി എന്നീ കോളജില്‍ പര്യടനം നടത്തി. കാംപസുകളില്‍ യു.ഡി.എസ്.എഫ് പ്രവര്‍ത്തകര്‍ വന്‍വരവേല്‍പ്പാണ് നല്‍കിയത്.
യു.ഡി.എഫ് നേതാക്കള്‍ക്ക് പുറമേ കെ.എസ്.യു നിയോജക മണ്ഡലം പ്രസിഡന്റ് അര്‍ഷാദ് പറമ്പത്ത്, എം.എസ്.എഫ് മണ്ഡലം പ്രസിഡന്റ് അര്‍ഷാദ് കടുവന്റവിട, കെ.എസ്.യു ജില്ലാ സെക്രട്ടറി അനസ് നങ്ങാണ്ടി എന്നിവര്‍ അനുഗമിച്ചു.
കഴിഞ്ഞ മാസം അന്തരിച്ച വാണിമേലിലെ കോണ്‍ഗ്രസ് നേതാവ് ടി. മൂസയുടെ വീട് സന്ദര്‍ശിച്ചതിന് ശേഷം വിശ്രമത്തില്‍ കഴിയുന്ന മുന്‍ എം.എല്‍.എയും മുസ്‌ലിം ലീഗ് നേതാവുമായ പണാറത്ത് കുഞ്ഞിമുഹമ്മദിനെയും സന്ദര്‍ശിച്ചു.