തിരുവനന്തപുരം: പൊതുവിദ്യാലയങ്ങളിലെ കുട്ടികള്‍ക്കുവേണ്ടിയുള്ള വിക്‌ടേഴ്‌സ് ചാനലിലൂടെയുള്ള ഓണ്‍ലൈന്‍ ക്ലാസ് 'ഫസ്റ്റ് ബെല്ലി'ന്റെ രണ്ടാംഘട്ട ട്രയല്‍ ഇന്നലെ ആരംഭിച്ചു. കൊവിഡ് പശ്ചാത്തലത്തില്‍ ഓണ്‍ലൈന്‍ ക്ലാസുകളുമായി മുന്നോട്ടുപോകാന്‍ സര്‍ക്കാര്‍ തീരുമാനിച്ചതിനെ തുടര്‍ന്ന് ജൂണ്‍ ഒന്നിന് തന്നെ ട്രയല്‍ ക്ലാസുകള്‍ ആരംഭിച്ചിരുന്നു. ഏഴുവരെ ട്രയലും തുടര്‍ന്ന് ഒരാഴ്ച ഇതിന്റെ പുന:സംപ്രേഷണവുമാണ് നിശ്ചയിച്ചിരുന്നത്. ഇതുപ്രകാരം ജൂണ്‍ ഒന്ന് മുതല്‍ സംപ്രേഷണം ചെയ്ത ക്ലാസുകള്‍ അതേക്രമത്തിലാണ് ഈയാഴ്ചയുമുണ്ടാകുക.  

എല്ലാ വിദ്യാര്‍ഥികള്‍ക്കും ഓണ്‍ലൈന്‍ സംവിധാനങ്ങള്‍ ആകുന്നത് വരെ ക്ലാസുകള്‍ ആവര്‍ത്തിക്കാനാണ് ഇപ്പോഴത്തെ തീരുമാനം. ക്ലാസുകള്‍ ആവര്‍ത്തിച്ച് സംപ്രേഷണം ചെയ്യാന്‍ കഴിഞ്ഞയാഴ്ച ചേര്‍ന്ന മന്ത്രിസഭായോഗമാണ് തീരുമാനിച്ചത്. അതേസമയം ബുധനാഴ്ചയ്ക്കകം എല്ലാവര്‍ക്കും ഓണ്‍ലൈന്‍ ക്ലാസിനുള്ള സൗകര്യങ്ങള്‍ ഒരുക്കുമെന്ന് വിദ്യാഭ്യാസ മന്ത്രി സി. രവീന്ദ്രനാഥ് അറിയിച്ചിട്ടുണ്ട്.