പന്തല്ലൂര്‍: ഉപ്പട്ടിയിലെ നിരവധി കുടുംബങ്ങള്‍ക്ക് കുടിവെള്ളം വിതരണം ചെയ്യാന്‍ ആസൂത്രണം ചെയ്തു നടപ്പാക്കിയ കുടിവെള്ള പദ്ധതി ഇനിയും പ്രവര്‍ത്തന സജ്ജമായില്ല.
വൈദ്യുതി കണക്ഷന്‍ ലഭിക്കാത്തതാണ് പദ്ധതി യാഥാര്‍ഥ്യമാകാന്‍ തടസമാകുന്നത്. നല്ലിയാളം നഗരസഭയുടെ നേതൃത്വത്തില്‍ ലക്ഷങ്ങള്‍ മുടക്കിയാണ് പദ്ധതി നടപ്പാക്കിയത്. എന്നാല്‍ വൈദ്യുതി കണക്ഷന്‍ ലഭിക്കാനുള്ള രേഖകള്‍ ശരിയാക്കുന്നതില്‍ വന്ന വീഴ്ചയാണ് പദ്ധതിക്ക് തിരിച്ചടിയാകുന്നതെന്ന് നാട്ടുകാര്‍ പറയുന്നു. വേനല്‍ കടുത്ത് പ്രദേശങ്ങളില്‍ കുടിവെള്ള ക്ഷാമം രൂക്ഷമായ സാഹചര്യത്തില്‍ വൈദ്യുതി കണക്ഷന്‍ ലഭ്യമാക്കി അടിയന്തരമായി പദ്ധതി യാഥാര്‍ഥ്യമാക്കാന്‍ അടിയന്തര നടപടിയുണ്ടാകണമെന്നാണ് നാട്ടുകാരുടെ ആവശ്യം.