മുക്കം: കോഴിക്കോട് കുതിരവട്ടം മാനസികാരോഗ്യ കേന്ദ്രത്തില്‍ ചികിത്സയിലിരിക്കെ തടവുചാടിയ റിമാന്‍ഡ് പ്രതിയെ മുക്കം പൊലിസ് പിടികൂടി.
കല്‍പ്പറ്റ വൈത്തിരി സ്വദേശി വിപിനെ (19) യാണ് മുക്കം എസ്.ഐ കെ.പി അഭിലാഷും സംഘവും ചേര്‍ന്ന് ഞായറാഴ്ച വൈകിട്ട് ആറോടെ മുക്കം മലയോരം ബാറിന്റെ പരിസരത്തുനിന്ന് പിടികൂടിയത്. മലപ്പുറം, മാനന്തവാടി, സുല്‍ത്താന്‍ ബത്തേരി, കുന്ദമംഗലം സ്റ്റേഷനുകളിലായി പത്തോളം മോഷണ കേസുകളില്‍ ഇയാള്‍ പ്രതിയാണെന്ന് മുക്കം പൊലിസ് അറിയിച്ചു.
ഇരുചക്ര വാഹനങ്ങളും ലാപ്‌ടോപ്പുകളുമാണ് ഇയാള്‍ പ്രധാനമായും മോഷ്ടിച്ചിരുന്നത്. പിടികൂടുന്ന സമയത്ത് പൊലിസിനെ അക്രമിക്കാന്‍ ശ്രമിച്ച പ്രതിയെ അതിസാഹസികമായാണ് എസ്.ഐയും സംഘവും കീഴ്‌പ്പെടുത്തിയത്. ഒരാഴ്ച മുന്‍പാണ് ഇയാള്‍ കുതിരവട്ടം മാനസികാരോഗ്യ കേന്ദ്രത്തില്‍നിന്നു കൂട്ടുപ്രതിയായ തിരുവമ്പാടി സ്വദേശി ക്രിസ്റ്റിയോടൊപ്പം തടവു ചാടിയത്. പൊലിസുകാരായ ലതീഷ്, സുരേഷ് കുമാര്‍, രാജേഷ് എന്നിവരും സംഘത്തിലുണ്ടായിരുന്നു.