മുക്കം: സ്ഥിരം അപകട മേഖലയായ കൊയിലാണ്ടി-എടവണ്ണ സംസ്ഥാന പാതയിലെ മുത്തേരിയില്‍ പി.ഡബ്ല്യു.ഡി ഉദ്യോഗസ്ഥര്‍ പരിശോധന നടത്തി. തുടര്‍ച്ചയായി നിരവധി അപകടങ്ങള്‍ ഉണ്ടായ സാഹചര്യത്തിലാണ് തിരുവമ്പാടി എം.എല്‍.എ ജോര്‍ജ് എം. തോമസിന്റെ നിര്‍ദേശ പ്രകാരം മുക്കം നഗരസഭാ ചെയര്‍മാന്‍ വി. കുഞ്ഞന്‍ മാസ്റ്ററുടെ നേതൃത്വത്തില്‍ പി.ഡബ്ല്യു.ഡി അധികൃതര്‍ ഇന്നലെ രാവിലെ പരിശോധന നടത്തിയത്.
അശാസ്ത്രീയമായ റോഡ് നിര്‍മാണവും സുരക്ഷാ ക്രമീകരണങ്ങള്‍ ഇല്ലാത്തതുമാണ് മിക്ക അപകടങ്ങള്‍ക്കും കാരണമെന്ന് സംഘം വിലയിരുത്തി. പരിശോധനയില്‍ വിശദമായ ഡി.പി.ആര്‍ തയാറാക്കി സര്‍ക്കാരിലേക്ക് സമര്‍പ്പിക്കാന്‍ ധാരണയായി. റോഡിന്റെ വളവ് നിവര്‍ത്താനും വീതി കൂട്ടുവാനും ആവശ്യമായ സ്ഥലത്ത് ഡ്രൈനേജ് സൗകര്യം ഒരുക്കുവാനും ഡിവൈഡറുകളും സൈന്‍ ബോര്‍ഡുകള്‍ സ്ഥാപിക്കാനുമുള്ള നിര്‍ദേശങ്ങള്‍ പ്രൊജക്ടില്‍ ഉള്‍പ്പെടുത്തിയിട്ടുണ്ട്.
നിര്‍ദിഷ്ട സ്ഥലത്തുള്ള പരസ്യ ബോര്‍ഡുകള്‍ നീക്കം ചെയ്യുന്നതിനുള്ള നടപടികള്‍ നഗരസഭയുടെ നേതൃത്വത്തില്‍ അടിയന്തരമായി സ്വീകരിക്കും. കഴിഞ്ഞ ഏതാനും വര്‍ഷങ്ങള്‍ക്കിടെ മുത്തേരിയില്‍ നടന്ന വിവിധ അപകടങ്ങളില്‍ 10 ഓളം പേര്‍ മരിക്കുകയും നിരവധി പേര്‍ക്ക് ഗുരുതരമായി പരുക്കേല്‍ക്കുകയും ചെയ്തിരുന്നു.
അമിതവേഗതയും അശ്രദ്ധമായ ഡ്രൈവിങ്ങുമായിരുന്നു മിക്ക അപകടങ്ങള്‍ക്കും കാരണം. തുടര്‍ച്ചയായി അത്യാഹിതങ്ങള്‍ സംഭവിക്കുമ്പോഴും സംസ്ഥാനപാതയിലെ വേഗത നിയന്ത്രിക്കുവാനോ സുരക്ഷാ ക്രമീകരണങ്ങള്‍ ഒരുക്കുവാനോ തയാറാകാതിരുന്ന അധികൃതര്‍ക്കെതിരേ പ്രതിഷേധം ശക്തമായതിനെ തുടര്‍ന്നാണ് നഗരസഭയുടെ നേതൃത്വത്തില്‍ പി.ഡബ്ല്യു.ഡി അധികൃതര്‍ പരിശോധന നടത്തിയത്.
പരിശോധനാ സംഘത്തില്‍ നഗരസഭാ ചെയര്‍മാനെ കൂടാതെ ആരോഗ്യ സ്റ്റാന്റിങ് കമ്മിറ്റി ചെയര്‍മാന്‍ പി. പ്രശോഭ് കുമാര്‍, കൗണ്‍സിലര്‍ പി. ബ്രിജേഷ്, പി.ഡബ്ല്യു.ഡി അസിസ്റ്റന്റ് എക്‌സിക്യൂട്ടീവ് എന്‍ജിനീയര്‍ ബിനു, അസിസ്റ്റന്റ് എന്‍ജിനീയര്‍ സോമന്‍, ഓവര്‍സിയര്‍ ഇ.കെ ശിവദാസന്‍, രാജന്‍, ബാലകൃഷ്ണന്‍ മുത്തരിയില്‍, പി. ജയരാജന്‍, ബാലകൃഷ്ണന്‍ നായര്‍, സുബഹ്മണ്യന്‍, ചന്ദ്രന്‍ മുത്തരി എന്നിവരുമുണ്ടായിരുന്നു.