പുത്തനത്താണി: സ്‌കൂള്‍ കുട്ടികളെ കുത്തി നിറച്ച് കൊണ്ടുപോകുന്ന വാഹനങ്ങള്‍ക്കെതിരേ മോട്ടോര്‍ വാഹന വകുപ്പ് നടപടികള്‍ ആരംഭിച്ചു. ഇന്നലെ കല്‍പകഞ്ചേരി മേഖലയില്‍ നടത്തിയ പരിശോധനയില്‍ 12 സ്‌കൂള്‍ വാഹനങ്ങള്‍ പിടികൂടി. ഇതില്‍ മൂന്ന് ഓട്ടോറിക്ഷകളെ താക്കീത് നല്‍കി വിട്ടയച്ചു.
കല്ലിങ്ങല്‍പറമ്പ് എം.എസ്.എം ഹയര്‍ സെക്കന്‍ഡറി സ്‌കൂളിന്റെ 28 കുട്ടികള്‍ക്കുള്ള വാഹനത്തില്‍ 98 കുട്ടികളെ കുത്തിനിറച്ച് കൊണ്ടു പോയ വാഹനം പിടികൂടി. സ്‌കൂള്‍ അധികൃതര്‍ക്ക് തിരൂര്‍ ജോ. ആര്‍.ടി.ഒ ഓഫിസില്‍ ഹാജരാകാന്‍ നോട്ടീസ് നല്‍കി.
പരിശോധനയില്‍ അമിതഭാരം, അനധികൃത ടാക്‌സികള്‍ എന്നിവയും പിടികൂടി.
വാഹന പരിശോധനക്ക് മോട്ടോര്‍ വാഹന വകുപ്പ് ഫഌയിങ് സ്‌ക്വാഡ് എം.വി.ഐ ബിജു നേതൃത്വം നല്‍കി.