നിലമ്പൂര്‍: അമല്‍ കോളജില്‍ ഇഗ്‌നോ സ്റ്റഡി സെന്ററിന് അംഗീകാരമായി. വിദ്യാര്‍ഥികള്‍ക്ക് സ്വന്തം നാട്ടില്‍ തന്നെ മികച്ച ബിരുദ ബിരുദാനന്തര കോഴ്‌സുകള്‍ പഠിക്കാനുള്ള അവസരമൊരുക്കുക എന്ന ലക്ഷ്യത്തോടെയാണ് മാനവ വിഭവശേഷി മന്ത്രാലയത്തിന്റെ (എം.എച്ച്.ആര്‍.ഡി) കീഴിലുള്ള ഇന്ദിരാ ഗാന്ധി നാഷനല്‍ ഓപ്പണ്‍ യൂനിവേഴ്‌സിറ്റിയുടെ (ഇഗ്‌നോ) സ്റ്റഡി സെന്റര്‍ അനുവദിച്ചത്. എം.എ സോഷ്യോളജി, ബി.എ സോഷ്യോളജി, എക്കണോമിക്‌സ്, സര്‍ട്ടിഫിക്കറ്റ് ഇന്‍ ടീച്ചിങ് ഓഫ് ഇംഗ്ലീഷ്, സര്‍ട്ടിഫിക്കറ്റ് ഇന്‍ അറബിക് ലാംഗ്വേജ്, ബാച്ച്‌ലേഴ്‌സ് പ്രീപ്രേറ്ററി പ്രോഗ്രാം എന്നിവയാണ് നിലവില്‍ അനുവദിച്ച കോഴ്‌സുകള്‍. ഇതിലേക്കുള്ള ആദ്യ ബാച്ചിന്റെ പ്രവേശന നടപടികള്‍ തുടങ്ങി. ഒഴിവു ദിവസങ്ങളിലാണ് ഇഗ്‌നോയുടെ ക്ലാസുകള്‍ നടക്കുക. അതിനാല്‍ വിവിധ മേഖലകളില്‍ ജോലി ചെയ്യുന്നതിനോടൊപ്പം തന്നെ വിവിധ കോഴ്‌സുകള്‍ ചെയ്യാനുളള അവസരമാണ് കൈവന്നിരിക്കുന്നത്.
എസ്.സി, എസ്.ടി വിഭാഗങ്ങള്‍ക്ക് ഡിഗ്രി, സര്‍ട്ടിഫിക്കേറ്റ്‌സ് കോഴ്‌സുകള്‍ പൂര്‍ണമായും സൗജന്യമായാണ് നടപ്പാക്കുന്നത്. ആദര്‍ശ് ഗ്രാമം പദ്ധതിയില്‍ ഉള്‍പ്പെടുത്തിയ ചാലിയാര്‍, കരുളായി, അമരമ്പലം പഞ്ചായത്തുകളിലെ എസ്.സി, എസ്.ടി വിഭാഗങ്ങള്‍ക്കും ഈ അവസരം ഉപയോഗപ്പെടുത്താനാകും.