തൊടുപുഴ: ഇടുക്കി പര്‍ലമെന്റ് മണ്ഡലത്തിലെ യു.ഡി.എഫ്. സ്ഥാനാര്‍ഥി ഡീന്‍ കുര്യാക്കോസിന്റെ വിജയം ഉറപ്പാക്കുന്നതുവരെ വിശ്രമമില്ലെന്ന് കേരള കോണ്‍ഗ്രസ് (എം) വര്‍ക്കിംഗ് ചെയര്‍മാന്‍ പി.ജെ.ജോസഫ് എം.എല്‍എ. കേരളാ കോണ്‍ഗ്രസ് (എം) തൊടുപുഴ നിയോജക മണ്ഡലം ജനറല്‍ ബോഡി യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
ഇടുക്കിയില്‍ നടക്കുന്നത് യു.ഡി.എഫും, എല്‍.ഡി.എഫും തമ്മിലുള്ള മത്സരമാണ്. കേന്ദ്ര സംസ്ഥാന സര്‍ക്കാരുകളുടെ ജനദ്രോഹ ഭരണത്തിനെതിരെയുള്ള വിധിയെഴുത്താണ് ഈ തെരഞ്ഞെടുപ്പില്‍ നടക്കുക.
സംസ്ഥാന സര്‍ക്കാരിന്റെ ഭരണം തികച്ചും കര്‍ഷക ദ്രോഹമാണ്. വെള്ളപ്പൊക്കത്തില്‍ വീടും ഭൂമിയും നഷ്ടപ്പെട്ടവരുടെ ലിസ്റ്റ് പോലും പൂര്‍ത്തീകരിക്കാന്‍ സര്‍ക്കാരിനായിട്ടില്ല. റോഡുകളെല്ലാം തകര്‍ന്നു തരിപ്പണമായി. കടക്കെണിയില്‍പ്പെട്ട കര്‍ഷകര്‍ കടം തിരിച്ചടക്കാന്‍ നിവൃത്തിയില്ലാതെ വരുകയാണ്.