തിരുവനന്തപുരം: ആരാധനാലയങ്ങള്‍ തുറക്കുന്നതുമായി ബന്ധപ്പെട്ട് സംസ്ഥാന സര്‍ക്കാരിനെതിരെ കടുത്ത വിമര്‍ശനവുമായി ബി.ജെ.പി സംസ്ഥാന അധ്യക്ഷന്‍ കെ സുരേന്ദ്രന്‍. ദേവസ്വം ബോര്‍ഡിന്റെ ക്ഷേത്രങ്ങള്‍ തുറക്കുന്നതിനു പിന്നില്‍ മന്ത്രി കടകംപള്ളിയുടെ ആര്‍ത്തിയാണെന്നും അത് വിശ്വാസികളുടെ മേല്‍ കെട്ടിവയ്ക്കരുതെന്നും സുരേന്ദ്രന്‍ പറഞ്ഞു.

കേന്ദ്രം പറയുന്നത് എല്ലാം നടപ്പാക്കിയവരാണോ സംസ്ഥാന സര്‍ക്കാര്‍. പതിനാല് ദിവസം ഇന്‍സ്റ്റിറ്റിയൂഷണര്‍ ക്വാറന്റൈന്‍ കേന്ദ്രം പറഞ്ഞത് സംസ്ഥാന സര്‍ക്കാര്‍ അതുപോലെയാണോ നടപ്പിലാക്കിയത്? മദ്യം വാങ്ങാന്‍ അഞ്ചുപേരില്‍ കൂടുതല്‍ ആളുകളെ ലൈനില്‍ തുടരാന്‍ അനുവദിക്കരുതെന്ന് കേന്ദ്രം പറഞ്ഞപ്പോള്‍ അതുപോലെയാണോ നടക്കുന്നത്. അപ്പോള്‍ എല്ലാം കേന്ദ്രത്തിന്റെ തലയില്‍ വെച്ച് നടപ്പിലാക്കാന്‍ കഴിയില്ല.

മുസ്ലിം മത മേലധ്യക്ഷന്‍മാര്‍ പള്ളികള്‍ തുറക്കുന്നില്ലെന്ന് തീരുമാനമെടുത്തു. ക്രൈസ്തവ ദേവാലയങ്ങളും ഇപ്പോള്‍ തുറക്കേണ്ടെന്ന നിലപാടിലാണ്. എന്നാല്‍ ക്ഷേത്രങ്ങളുടെ കാര്യത്തില്‍ മാത്രം സര്‍ക്കാര്‍ തീരുമാനമെടുത്തു. കേരളത്തില്‍ വിശ്വാസികളുടെ കാര്യത്തില്‍ രണ്ട് തരം നീതിയാണ് സര്‍ക്കാര്‍ നടപ്പിലാക്കുന്നത്.
നിലവിലെ സാഹചര്യത്തില്‍ മുപ്പതാം തീയതി വരെ ക്ഷേത്രം തുറക്കേണ്ടതില്ല എന്ന നിലപാട് തന്നെയാണ് ബി.ജെ.പിക്കുമുള്ളതെന്നും സുരേന്ദ്രന്‍ പറഞ്ഞു.