ബദിയഡുക്ക: ബൈക്ക് യാത്രക്കാരനായ യുവാവിനെ മറ്റൊരു ബൈക്കില്‍ പിന്തുടര്‍ന്ന് എത്തിയ സംഘം തടഞ്ഞുനിര്‍ത്തി കണ്ണില്‍ മുളക് പൊടി വിതറി പണവും സ്വര്‍ണവും കവര്‍ന്നതായി പരാതി. ബദിയഡുക്ക പൊലിസ് സ്റ്റേഷന്‍ പരിധിയിലെ ബാഡൂര്‍ പദ്യാനയിലാണ് സംഭവം. ബൈക്കില്‍ പധ്യാനയിലെ ബന്ധു വീട്ടിലേക്ക് പോകുന്നതിനിടെ മൊഗ്രാല്‍ സ്വദേശിയായ അബ്ദുള്‍ ശുഹൈബ് (27) ആണ് അക്രമത്തിനിരയായത്. ബൈക്കിലെത്തിയ രണ്ടംഗ സംഘം ബാഡൂര്‍ പധ്യാനയിലെത്തിയപ്പോള്‍ ബൈക്ക് തടയുകയും വലിച്ചിറക്കി കണ്ണില്‍ മുളക് പൊടി വിതറുകയും കൈവശമുണ്ടായിരുന്ന 95,000 രൂപയും 15 പവന്‍ സ്വര്‍ണവും കവര്‍ന്നതായാണ് പരാതി.
ബഹളം കേട്ട് ഓടികൂടിയ നാട്ടുകാരാണ് ശുഹൈബിനെ കാസര്‍ക്കോട്ടെ സ്വകാര്യ ആശുപത്രിയില്‍ പ്രവേശിച്ചു. ബന്ധുവിന്റെ വിവാഹ ആവശ്യത്തിന് കൊണ്ടുപോയ സ്വര്‍ണവും പണവും കവര്‍ന്നതായി യുവാവ് പറഞ്ഞതായി പൊലിസ് പറഞ്ഞു. പ്രതികള്‍ക്ക് വേണ്ടി പൊലിസ് തിരച്ചില്‍ തുടങ്ങി.