വല്ലപ്പുഴ: രൂക്ഷമായ കുടിവെള്ള പ്രശ്‌നം നേരിടുന്നതില്‍ വല്ലപ്പുഴ പഞ്ചായത്ത് കാണിക്കുന്ന അനാസ്ഥക്കെതിരേ യോഗത്തില്‍നിന്ന് യു.ഡി.എഫ് ഭരണ സമിതിയംഗം ഇറങ്ങിപ്പോയി. പതിനഞ്ചാം വാര്‍ഡ് മെമ്പര്‍ കുഞ്ഞാണിയാണ് ഇറങ്ങിപ്പോയത്.
വിവിധ പ്രദേശങ്ങളില്‍ രൂക്ഷമായ കുടിവെള്ള പ്രശ്‌നം നേരിട്ടിട്ടും ഭരണ സമിതി കാണിക്കുന്ന അനാസ്ഥക്കെതിരേ എസ്.ഡി.പി.ഐ ഏതാനും ദിവസം മുമ്പ് പഞ്ചായത്തിലേക്ക് മാര്‍ച്ച് നടത്തിയിരുന്നു. ഇതേതുടര്‍ന്നാണ് ഭരണസമിതിയംഗം തന്നെ പഞ്ചായത്തിലെ വിവിധ പ്രദേശങ്ങളില്‍ അനുഭവപ്പെടുന്ന രൂക്ഷമായ കുടിവെള്ള പ്രശ്‌നം പരിഹരിക്കണമെന്നും പഞ്ചായത്തിന്റെ തനതു വികസന ഫണ്ട് ഇതിനായി ഉപയോഗിക്കാന്‍ സര്‍ക്കുലര്‍ ഉണ്ടല്ലോ എന്ന ഓര്‍മപ്പെടുത്തലും ഭരണ സമിതി യോഗത്തില്‍ നടത്തിയത്. അത്തരത്തിലുള്ള ഒരു സര്‍ക്കുലറിനെ കുറിച്ച് അറിയില്ലെന്നും ടാങ്കര്‍ ഉപയോഗിച്ച് വെള്ളം വിതരണം നടത്താന്‍ പഞ്ചായത്തിന്നു കഴിയില്ലെന്നും പരിമിതികളുണ്ടെന്നുമാണ് പ്രസിഡന്റ് പറഞ്ഞത്. പ്രസിഡന്റിന്റെ മറുപടിയില്‍ തൃപ്തകാത്തതിനാലാണ് ഭരണ സമിതിയംഗം യോഗത്തില്‍നിന്ന് ഇറങ്ങിപ്പോയത്.