തളിപ്പറമ്പ്: 11കാരിയായ സ്‌കൂള്‍ വിദ്യാര്‍ഥിനിയെ കാട്ടിലേക്ക് വലിച്ചുകൊണ്ടു പോയി പീഡിപ്പിക്കാന്‍ ശ്രമിച്ച യുവാവിനെ നാട്ടുകാര്‍ പിടികൂടി പൊലിസിലേല്‍പ്പിച്ചു. കടന്നപ്പള്ളിയിലെ ശ്യാം സത്യന്‍ ആണ് പിടിയിലായത്. ബക്കളത്ത് ഇന്നലെ വൈകിട്ടായിരുന്നു സംഭവം. സ്‌കൂള്‍ വിട്ട് വീട്ടിലേക്കു പോവുകയായിരുന്ന വിദ്യാര്‍ഥിനിയെ അതുവഴി വരികയായിരുന്ന ശ്യാം സത്യന്‍ പീഡിപ്പിക്കാന്‍ ശ്രമിച്ചു. വഴി ചോദിക്കുന്നതിനിടയില്‍ ആള്‍താമസമില്ലാത്ത വീടിന് പിറകിലെ കാട്ടിലേക്ക് വലിച്ചു കൊണ്ടുപോയി പീഡിപ്പിക്കാന്‍ ശ്രമിക്കുന്നതിനിടെ ശ്യാമിന്റെ പിടിയില്‍ നിന്നും രക്ഷപ്പെട്ട പെണ്‍കുട്ടി അടുത്തുളള വീട്ടില്‍ അഭയം തേടുകയായിരുന്നു. വീട്ടുകാര്‍ സമീപവാസികളെ വിവരമറിയിക്കുകയും തുടര്‍ന്ന് നടത്തിയ തെരച്ചിലില്‍ കാട്ടിനുള്ളില്‍ വച്ച് ശ്യാമിനെ പിടികൂടുകയും ചെയ്തു. നാട്ടുകാര്‍ വിവരമറിയിച്ചതിനെ തുടര്‍ന്നെത്തിയ പൊലിസ് ശ്യാമിനെ അറസ്റ്റ് ചെയ്ത് പോക്‌സോ നിയമപ്രകാരം കേസെടുത്തു.