കോഴിക്കോട്: സമസ്ത കേരള ജംഇയ്യതുല്‍ മുദരിസീനു കീഴിലുള്ള മുഴുവന്‍ പള്ളി ദര്‍സുകളിലും ഓണ്‍ലൈന്‍ ക്ലാസുകള്‍ ആരംഭിക്കുന്നു. മുദരിസുമാര്‍ അവരുടെ വിദ്യാര്‍ഥികള്‍ക്ക് ഓണ്‍ലൈനിലൂടെ അധ്യാപനം നടത്തുക എന്ന മാര്‍ഗമാണ് അവലംബിക്കുക.
ഓണ്‍ലൈനായി ക്ലാസ് നടത്തുന്നതിന്റെ ഔപചാരിക ഉദ്ഘാടനം സമസ്ത കേരള ജംഇയ്യതുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ നിര്‍വഹിച്ചു. മുണ്ടക്കുളം ശംസുല്‍ ഉലമ സ്മാരക ഇസ്‌ലാമിക് കോംപ്ലക്‌സില്‍ നടന്ന ചടങ്ങില്‍ ജംഇയ്യതുല്‍ മുദരിസീന്‍ സംസ്ഥാന ജനറല്‍ സെക്രട്ടറി എ.വി അബ്ദുറഹ്മാന്‍ മുസ്‌ലിയാര്‍ അധ്യക്ഷനായി.
അബ്ദുല്‍ ഖാദര്‍ ഫൈസി കുന്നുംപുറം, അബ്ദുറഹ്മാന്‍ ഫൈസി അരിപ്ര, സി.കെ മൊയ്തീന്‍ ഫൈസി, അബ്ദുല്‍ ഗഫൂര്‍ അന്‍വരി, അബ്ദുല്‍ ഗഫൂര്‍ ദാരിമി മുണ്ടക്കുളം പ്രസംഗിച്ചു.