ഇംഫാല്‍: രാജ്യസഭാ തെരഞ്ഞെടുപ്പിനുള്ള അവസാനഘട്ട ഒരുക്കങ്ങള്‍ക്കിടെ മണിപ്പൂരില്‍ ബി.ജെ.പിക്കു തിരിച്ചടി. നിയമസഭാ തെരഞ്ഞെടുപ്പിനു പിന്നാലെ കോണ്‍ഗ്രസ് വിട്ട കോണ്‍ഗ്രസ് വിമത എം.എല്‍.എമാരെ നിയമസഭയില്‍ പ്രവേശിപ്പിക്കരുതെന്നാണ് കഴിഞ്ഞ ദിവസം മണിപ്പൂര്‍ ഹൈക്കോടതി ഉത്തരവിട്ടത്.
ഇവരെ അയോഗ്യരാക്കണമെന്ന കോണ്‍ഗ്രസിന്റെ ആവശ്യത്തില്‍ നിയമസഭാ സ്പീക്കര്‍ ഇതുവരെ തീരുമാനമെടുത്തിട്ടില്ല. ഇനിയൊരു ഉത്തരവുണ്ടാകുന്നതുവരെ എം.എല്‍.എമാരെ സഭയില്‍ പ്രവേശിപ്പിക്കരുതെന്നാണ് കോടതി ഉത്തരവിട്ടിരിക്കുന്നത്.
രാജ്യസഭാ തെരഞ്ഞെടുപ്പില്‍ ഈ എം.എല്‍.എമാര്‍ ബി.ജെ.പിയെ അനുകൂലിച്ച് വോട്ടുചെയ്യുമെന്നായിരുന്നു പ്രതീക്ഷിച്ചിരുന്നത്. എന്നാല്‍, കോടതിയുടെ വിധിയോടെ ഇവരുടെ വോട്ട് കിട്ടുമെന്ന പ്രതീക്ഷ ബി.ജെ.പിക്കു നഷ്ടപ്പെട്ടിരിക്കുകയാണ്.
ഇവരെ അയോഗ്യരാക്കണമെന്നാവശ്യപ്പെട്ട് പാര്‍ട്ടി 2018 നവംബര്‍ എട്ടിനുതന്നെ സ്പീക്കറെ സമീപിച്ചിരുന്നു. ഇക്കാര്യത്തില്‍ ഇതുവരെ സ്പീക്കര്‍ വൈ. ഖേംചന്ദ് തീരുമാനമെടുക്കാത്തതിനെയും കോടതി വിമര്‍ശിച്ചു. സ്പീക്കറുടെ നടപടിയെ വഞ്ചനാപരമെന്നാണ് കോടതി വിശേഷിപ്പിച്ചത്.
2017ലെ നിയമസഭാ തെരഞ്ഞെടുപ്പിനു ശേഷം സംസ്ഥാനത്ത് സര്‍ക്കാരുണ്ടാക്കാന്‍ ബി.ജെ.പിയെ സഹായിച്ച ഈ എം.എല്‍.എമാര്‍, കോണ്‍ഗ്രസില്‍നിന്നു രാജിവച്ചിരുന്നെങ്കിലും കോണ്‍ഗ്രസ് ടിക്കറ്റില്‍ ജയിച്ച എം.എല്‍.എ സ്ഥാനം രാജിവയ്ക്കാന്‍ തയാറായിരുന്നില്ല.