വെള്ളാങ്ങല്ലൂര്‍: വൃദ്ധയെ കബളിപ്പിച്ച് അജ്ഞാതന്‍ സ്വര്‍ണമാല തട്ടിയെടുത്തതായി പരാതി. വെള്ളാങ്ങല്ലൂര്‍ ഗ്രാമപഞ്ചായത്ത് ഓഫിസിന് മുന്‍പില്‍ തിങ്കളാഴ്ച രാവിലെ പതിനൊന്ന് മണിയോടെയാണ് സംഭവം.
കോണത്തുകുന്ന് കളവമ്പാറ സരസ്വതിയുടെ രണ്ട് പവന്‍ തൂക്കം വരുന്ന സ്വര്‍ണമാല മകന്‍ ആവശ്യപ്പെട്ടുവെന്ന വ്യാജേനയാണ് അജ്ഞാതന്‍ ഊരി വാങ്ങി കടന്ന് കളഞ്ഞത്. മകന്റെ സുഹൃത്താണെന്ന് പരിചയപ്പെടുത്തി പരിചിത രൂപത്തില്‍ സംസാരിച്ച ആള്‍ ഗള്‍ഫിലുള്ള മകനെ ഏതോ ആവശ്യത്തിന് സഹായിച്ചുവെന്നും അതിന് പകരമായി 5000 രൂപ അമ്മയില്‍ നിന്നും വാങ്ങാന്‍ പറഞ്ഞിട്ടുണ്ടെന്നും പറഞ്ഞു.
പൈസ കൈയിലില്ലെന്നും വീട്ടില്‍ വന്നാല്‍ തരാമെന്നും പറഞ്ഞപ്പോള്‍ ഇപ്പോള്‍ അത്യാവശ്യമുണ്ടെന്ന് ആള്‍ പറഞ്ഞു. തുടര്‍ന്ന് അയാളുടെ ഫോണില്‍ നിന്നും മറ്റൊരാളെ വിളിച്ച് വൃദ്ധയുടെ കൈയില്‍ കൊടുത്തു. ഫോണില്‍ മകനാണെന്ന് തെറ്റിദ്ധരിച്ച വൃദ്ധ സ്വര്‍ണമാല ഊരി അയാള്‍ക്ക് നല്‍കുകയായിരുന്നു. പിന്നീടാണ് കബളിപ്പിക്കപ്പെട്ടതാണെന്ന് മനസിലായത്.
പഞ്ചായത്ത് ഓഫിസിലെ സി.സി.ടി.വിയില്‍ കബളിപ്പിച്ച ആളെന്ന് സംശയിക്കുന്ന ആളുടെ ദൃശ്യങ്ങള്‍ പതിഞ്ഞിട്ടുണ്ട്. പൊലിസില്‍ പരാതി നല്‍കിയിട്ടുണ്ട്.